Фарғона вилояти ҳокими Шуҳрат Ғаниевнинг тўй маросимлари ҳақидаги фикрларини «Дарё»нинг Фарғонадаги мухбири «Фарғона ҳақиқати» газетасига таяниб келтириб ўтди.
«Тўй инсон умрининг мазмунини белгилайдиган, орзу-армонлари ушаладиган, ҳаётида маълум маънода ёруғ излар қолдирадиган ажойиб байрам. Аслида ўзбекнинг ўзига тўқлигини тўйлари ифодалайди, тўйларни умрларга берилган таъриф дейдилар.
Аммо кейинги пайтларда тўйларимиз харажати, янги тўқиб чиқарилган расм-русумлар ҳашамати меъёрдан ошиб кетди. Бу ҳақда кўп айтилса, матбуотда кўп ёзилса ҳам, баъзи бир ҳамюртларимиз тўй кўнгил иши, қабилида иш тутиб, пинак бузмасдан ёқимсиз одатларга йўлбошчилик қилиш ҳолатлари ҳамон давом этмоқда».
«Тўй ва маросимларни ўтказишда давлат органлари ва муассасаларнинг раҳбарлари шахсан намуна бўлишлари шарт. Керак бўлса, бу борада уларнинг шахсий масъулияти ва жавобгарлиги оширилади».
«Катта лавозимдаги раҳбарнинг тўй қилиши қийин эмас. Боз устига, унинг тўйи учун ҳамма камини қилишга тайёр лаганбардорлари, шогирдлари, таниш-билишлари бўлади. У тўйни тўёна йиғиш учунгина ўтказади. Ваколатидан фойдаланиб, мансабини суистеъмол қилиб, шахсий манфаати йўлида қўл остидагиларга, қуйи поғоналарга тўйи ёки маъракаси учун «солиқ» ҳам солади. Қизи ёки ўғлининг қуюшқондан чиққан талаблари сўзсиз бажарилади. Рафиқасининг барчадан ўтиш керак деган қоидаси амалда намоён бўлади. Тўйхона, тўй, уй данғиллама. Аммо ўша шуҳратпараст раҳбарнинг маҳалласи асфальт эмас. Ёки қатор ўғилларини уйлай олмаётган қўшниси ҳам бордир. Кимдир пулни кўкка сочяпти, совуряпти, кераксиз дабдабалар учун сарфлаб юборяпти.
Бойнинг қизичалик бўлмаса ҳам элдан кам бўлмасин, дея яна кимдир умрини, вақтини тўйга сарфлаш учун пул топгани бағишлаяпти. Умр бўйи Россия ва бошқа давлатларда ҳалол меҳнат қилиб, ҳатто ўша жойларда ажал топганлар ҳам бор. Қизи тўйда киядиган бир неча соатлик оқ кўйлак учун миллион топиб бера олмаган отанинг изтироби, оиланинг жароҳатидан ортиқроқ дард йўқ.
Тўй-ҳашамлар ва бошқа оилавий маросимларни камхарж ва тартибли ўтказиш бўйича хорижий мамлакатлар, Шарқ давлатларининг ибратли тажрибаларини ўрганиш фойдадан холи эмас.
Бошқа халқларда (энг миллиардер бўлса ҳам) нишонланадиган тўй маросимларида нари борса 20—30 ёки ундан сал кўпроқ одам қатнашади. Меҳмонлар тик туриб, қарсак чалиб, икки ёшга бахт тилаб, енгилгина тамадди қилиб қайтавераркан.
Кореяда чоғроққина қаҳвахонада тўйбошилар миллий кийимларида эшик олдида туришар экан. Тўйга келганлар совғаларини бериб, бўш столга ўтираркан. Бу ерга овқатланиш учун эмас, келин-куёвни табриклаб, дил изҳор қилиб, ҳадясини бериш учунгина келишар ва раҳмат айтиб чиқиб кетишар экан. Тўйга келганлар хурсанд, ёшлар жуда бахтиёр уларда. Бизда эса тўй ўтказган одамнинг юки енгил бўлиш ўрнига баттар оғирлашади. Олган қарзларини тўлашни тўйнинг эртасидан бошлаб ўйлаб, юраги сиқилади. Дабдабали тўй ўтказган ҳамюртларимизнинг айримлари Тошкент, Самарқанд ёки Бухорони кўришмаган. Дунёнинг қанақалигини эса, ҳатто, билишмайди. Аммо ким ўзарга баҳслашишда бир-биридан қолмайдилар. Тўйларимиз туфайли ўз қобиғимизга ўралиб қоляпмиз. Энди ҳашаматларни бас қилиш фурсати келди! Тўйга тўкиб-сочиш керак деган аҳмоқона бидъатдан тезда, кескин воз кечиш зарур».
«Вилоятимиз маҳаллаларида тўйларни камчиқим ўтказиш бўйича тарғибот тадбирларида, аҳоли ўртасида кенг тушунтириш ишларини олиб боришда ҳаммамиз фаол иштирок этишимиз керак», – дейди вилоят ҳокими.
Изоҳ (0)