Ўзбекистонда Қуръон тиловати мусобақаси давом этаётган кунларда мамлакат тарихида илк бор Муcҳафи шариф чоп этилди ва сотувга чиқди. Бу ҳақда «Muslimaat.uz» хабар бермоқда.
Шу ўринда бу муборак ҳаракатни 5-6 йил аввал шайх Муҳаммад Содиқ Муҳаммад Юсуф ҳазратлари бошлаб берганларини айтиб ўтмоқ керак. Холис ният билан бошланган иш алал-оқибат ўз самарасини берди. Афсуски, ҳазратнинг ўзлари орзулари амалга ошганини кўра олмадилар. Аммо мазкур хайрли ишларни у кишининг ворислари, хусусан, Исмоил Муҳаммад Юсуф ва бир қанча шогирдлари давом эттирмоқда.
Янги Қуръони Карим китобини «Ҳилол-нашр» нашриёти «Дорус-салом» нашриётининг расмий рухсати ва аслий нусхаси асосида, Ўзбекистон мусулмонлари идораси билан ҳамкорликда чоп этишга мушарраф бўлди.
Вазирлар Маҳкамаси ҳузуридаги Дин ишлари бўйича қўмита Мусҳафни узлуксиз нашр этиш учун рухсат беришни ваъда қилгани ҳам алоҳида эътиборга молик. Демак, Қуръони Каримни келгусида худди шу нарх ва шу сифатда харид қилишимиз мумкин.
Нашриёт директори Абдулваҳид Саттиевнинг таъкидлашича, ҳар икки ярим ойда Мусҳафи шариф 10 минг нусхадан чоп этилаверади.
Маълумотларга қараганда, Дин ишлари бўйича қўмита Мусҳафни 50 мингта нусхада чоп этишга рухсат берган. Лекин ҳозирча 10 минг нусха чоп этилди ва илк сотувга чиққан куни — 28 мартнинг ўзидаёқ сотиб бўлинди. «Ҳилол-нашр» нашриётининг 7 та дўкони, шунингдек, вилоятлардаги ҳамкор китоб дўконларига ўз нархида сотиш шарти билан Қуръони Карим китоблари тарқатилган.
Мусҳафлар барча дўконларда бир хил нархда — 31.000 сўмдан сотилди. Уни харид қилиш учун юзага келган узун навбат илгари ҳеч кузатилмаганди. Нашриётнинг бош дўконига 3000 дан ошиқ одам Мусҳаф сотиб оламан, деб эрта тонгдан келган ва бу узун навбатни кўриб ҳеч ким кетиб қолмаган.
Мусҳаф, шунингдек, интернет ва почта орқали ҳам сотилди. Бунда манзилга етказиб бериш хизмати билан нашр нархи 41.000 сўмни ташкил этди. Бир манзилдан келган икки сўровнинг бири рад қилинган. Сабаби исм-шариф ҳар хил бўлса-да, турар-жой бир манзилни кўрсатган.
У кишининг эътироф этишича, бундай китоб олди-сотдиси ҳали нашриёт тарихида кузатилмаган. «Китоб дўконида 10 нафар ходим эрталабдан то асргача тиним билмадик», дейди нашриёт директори.
Китобни харид қилганлардан бири Маҳфузахон Шамсиддинова шундай дейди: «Эрталаб соат 8.00 да дўконга келдим ва навбатга 398-ўринда ёзилдим. Китобни олиб кетаётганимда ортимда ҳали минглаб одамлар бор эди».
Абдулваҳид Саттиевнинг айтишича, келажакда Қуръони Карим китобини босиш учун алоҳида босмахона мажмуаси қурилади ва махсус ускуналар билан таъминланади. Унда ҳар хил бичимдаги ва турли рангдаги катта-кичик Мусҳафи шариф китоблари нашр этилиши мақсад қилинган.
Изоҳ (0)