«Халқ сўзи» газетасида Шанхай ижтимоий фанлар академияси ҳузуридаги Хавфсизликни таъминлаш ва инқирозли вазиятларни тартибга солиш бўйича халқаро марказ директори Алессандро Ардуинонинг мақоласи чоп этилди. Уни тўлиғича келтириб ўтамиз.
Шавкат Мирзиёев томонидан белгилаб берилган Ўзбекистонни 2018 йилда ижтимоий-иқтисодий ривожлантиришнинг устувор йўналишлари жамият ҳаётининг барча жабҳаси чуқур ўрганилган ва таҳлил қилинган ҳолда ишлаб чиқилган, мамлакатни янгилашнинг аниқ стратегияси сифатида гавдаланади.
Дунё иқтисодиётидаги турғунликка қарамасдан, Ўзбекистон Республикаси Президентининг фаол саъй-ҳаракатлари 2017 йилда зарур натижаларни бера бошлади. Бу, айниқса, савдо баланси сальдоси кўпайиши ҳамда мамлакат иқтисодиётининг умумий ўсишида намоён бўлди.
Солиқ имтиёзлари ва преференциялари, шунингдек, барқарор солиқ базасига эга бўлиш мақсадида бозорни қатъий солиқ ставкаларини камайтириш йўли билан рағбатлантириш мамлакат иқтисодиётининг мувозанатли ривожланишига хизмат қилади. Халқаро инвесторлар нуқтаи назарича, Ўзбекистон иқтисодиётини янада либераллаштириш, унинг ҳуқуқий асосларини такомиллаштириш ҳамда ишлаб чиқаришни диверсификациялаш ва модернизациялашга қаратилган кўламли ислоҳотлар, шунингдек, валютанинг эркин конвертацияси мамлакатдаги янгиланишлар даврида сармоядорларни чорлайдиган ўзига хос «очиқ таклифнома» ҳисобланади.
Масалан, Хитойда Дэн Сяопин 1978 йилдан «ислоҳотлар ҳамда очиқлик» сиёсатини жорий қилди. Унга кўра, махсус иқтисодий зоналарни ташкил этиш миллий иқтисодиётни ривожлантиришнинг тамал тоши бўлиши лозим эди. Айнан махсус иқтисодий зоналар кейинги ўттиз йил давомида Хитойда ялпи ички маҳсулотнинг икки хонали рақамларда ўсишига имкон берди. Худди шундай, Ўзбекистонда ташкил қилинган махсус саноат ва иқтисодий зоналар ҳам ўз самарасини бера бошлади.
Президент Шавкат Мирзиёевнинг парламентга Мурожаатномаси мустаҳкам давлатни малакали ва истеъдодли кадрларсиз барпо этиш имконсиз эканлигини яна бир карра тасдиқлади. Шу маънода, Ўзбекистон ёшларининг халқаро ассоциацияси тузилиши мамлакат равнақида ҳал қилувчи аҳамият касб этади. Чунки хорижда ўз билим ҳамда кўникмаларини мустаҳкамлаб бораётган ёш иқтидорли мутахассислар чет эл бизнес тажрибасини ўзлаштиришда жуда муҳим рол ўйнайди. Шу ўринда яна бир мисол: Хитойда «100 истеъдод», Европа иттифоқида Erasmus дастурлари эълон қилинган.
Бугун инновацион тараққиётнинг юқори суръатлари, масалан, ахборот технологиялари, автоматлаштирилган саноат талабларига жавоб берадиган истеъдодли ва юқори малакали кадрларга эҳтиёж ниҳоятда катта.
Шавкат Мирзиёев халқ билан мулоқот тамойили давлат бошқаруви тизими самарадорлигини тубдан оширишда асосий ўрин тутишини бот-бот таъкидлаб келади. Бундай ахборотларнинг мамлакат аҳолиси ва дунё ҳамжамиятига етказилиши Ўзбекистоннинг ўз олдига қўйган мақсадларга эришишида ҳар томонлама қўллаб-қувватланишига замин яратади. Бу ниҳоятда муҳимдир.
Халқаро майдондаги ноаниқликлар, ижтимоий-иқтисодий ва сиёсий можаролар, миллатчилик унсурлари тобора намоён бўлаётган бир шароитда Ўзбекистон ҳукумати кенг кўламли ривожланишга ҳамда иқтисодий самарадорликка эриша олди. Буюк Ипак йўлининг қоқ марказида жойлашган Ўзбекистон «Бир макон, бир йўл» ташаббуси доирасида ҳал қилувчи ўрин тутади. Бинобарин, Ғарб-у Шарқни ўзаро боғлаган Буюк Ипак йўлининг тарихий тараққиёти чорраҳасидаги мазкур мамлакат илм-фан ва сиёсий барқарорлик маркази ҳам бўлган. Ўйлаймизки, Тошкент олиб бораётган сиёсат замирида устуворлик мавқеини тиклаш мақсади мужассам, десак, хато бўлмайди.
Алессандро АрдуиноШанхай ижтимоий фанлар академияси ҳузуридаги Хавфсизликни таъминлаш ва инқирозли вазиятларни тартибга солиш бўйича халқаро марказ директори
Изоҳ (0)