Ўзбекистон Президенти Шавкат Мирзиёев «Ўсимликлар карантини бўйича давлат хизмати фаолиятининг самарадорлигини оширишга доир қўшимча чора-тадбирлар тўғрисида»ги қарорни имзолади. Ҳужжат матнини ЎзА
келтирди.
Фото: ЎзАМазкур қарорга мувофиқ, ўсимликлар карантини соҳасидаги халқаро стандартларни миллий қонунчиликка имплементация қилиш бўйича доимий фаолият кўрсатувчи идоралараро ишчи гуруҳ тузилади.
Ўсимликлар карантини соҳасидаги ишлар ҳолатини комплекс ўрганиш, соҳадаги халқаро шартномалар, жумладан, ўсимликлар карантини ва ҳимояси бўйича халқаро конвенцияга қўшилиши бўйича аниқ чора-тадбирларни ишлаб чиқиш, миллий қонунчиликнинг ўсимликлар карантини соҳасидаги барча халқаро стандартларга мувофиқлигини таъминлаш юзасидан таклифлар тайёрлаш, хорижий давлатлар карантин хизматлари билан ўсимликлар карантини соҳасида ҳамкорлик бўйича битимлар тузиш масаласини ишлаб чиқиш ва уларнинг лойиҳаларини тайёрлаш мазкур ишчи гуруҳнинг асосий вазифалари этиб белгиланди.
Вазирлар Маҳкамаси ҳузуридаги Ўсимликлар карантини давлат инспекцияси тузилмаси кенгайтирилади, қўшимча штат бирликлари ажратилади ҳамда қатор имтиёзларга эга бўлади.
Қорақалпоғистон Республикаси ва вилоятларда ўсимликларнинг агротехник, биологик ва кимёвий ишловини амалга ошириш учун давлат-хусусий шериклик шартлари асосида камида 2 тадан ўсимликлар клиникаси ташкил этилади.
Ўсимликлар карантини бўйича инспекторлар хизмат мажбуриятларини бажаришда махсус формали кийим-бош ва тегишли фарқловчи белгиларини кийиб юради. Уларнинг фаолияти рейтинг тизимида баҳоланиб, уларга 50 фоиздан 150 фоизгача рағбатлантирувчи тўловлар берилади.
Изоҳ (0)