Туркияда истиқомат қилаётган мухолифатдаги «Ўзбекистон халқ ҳаракати» етакчиси Муҳаммад Солиҳ Ўзбекистон Республикасининг конституциявий тузумига тажовузда айбланаётган журналист Бобомурод Абдуллаев иши бўйича кўрсатма беришга тайёрлигини билдирди. Бу ҳақда жиноят ишлари бўйича Тошкент шаҳар судининг навбатдаги мажлисида Абдуллаевнинг адвокати Сергей Майоров маълум қилди, дея хабар беради «Газета.uz».
«Абдуллаевнинг адвокати сифатида менга Муҳаммад Солиҳ ҳимоям остидаги шахснинг у айбланаётган жиноятларга алоқаси йўқлиги ҳақидаги баёнот билан мурожаат қилди. Муҳаммад Солиҳ билан бир неча бор мулоқотда бўлдим. У ЎХҲ сайтида ‘Усмон Ҳақназаров’ тахаллуси билан чоп этилган ‘Ислом Каримовнинг ‘табиий’ ўлими қандай уюштирилди’, ‘Саримой фожиаси ҳақидаги ҳақиқат’, ‘Сурия сабоқлари ва ‘тинчликсеварларъга жавоблар’, ‘Ислом Каримов умрбод ҳокимиятда қолишга қарор қилди’ каби мақолаларни Бобомурод Абдуллаев ёзмаганини айтди», — таъкидлади Майоров.
Муҳаммад Солиҳ суд танловига кўра Telegram, Viber, Imo, Skype ва бошқа дастурлар орқали интерактив тартибда, шунингдек, суд тақдим этган саволларга ёзма тариқада кўрсатма беришга тайёрлиги, кўрсатмаларни легаллаштириш учун уларни Ўзбекистоннинг Туркиядаги консулига тақдим этиши мумкинлигини билдирди.
Сергей Майоров судга Солиҳнинг мактубини жиноий ишга қўшиш ва уни гувоҳ сифатида Ўзбекистоннинг Туркиядаги консуллиги иштирокида сўроқ қилиш ҳақидаги илтимосномани киритди.
Адвокатлар, прокурор ва Бобомурод Абдуллаев буни қўллаб-қувватлади. Зафар Нурматов раислигидаги суд маслаҳатлашиб, илтимосномани қондирмасликка қарор қилди. Суд буни барча судланувчилар, гувоҳлар, мутахассислар ва бошқа қатнашчилар сўроқ қилиб бўлинмагани билан изоҳлади.
«Олдин бу иш бўйича барча қатнашчиларни сўроқ қиламиз. Шундан сўнг, керак бўлса, яна давом эттиришимиз мумкин. Суд ҳозир илтимоснома киритилишининг мавриди эмас, деб ҳисоблайди», — деди Зафар Нурматов.
Изоҳ (0)