Журналист Бобомурод Абдуллаев жиноят ишлари бўйича Тошкент шаҳар судининг навбатдаги мажлисида блогер Ҳаётхон Насриддинов ва тадбиркор Равшан Салаев томонидан ўтказилаётган руҳий босимдан шикоят қилди. Уларнинг уччови ва Шавкат Оллоёров Ўзбекистон конституциявий тузумига тажовузда айбланмоқда, дея хабар беради «Газета.uz».
«Ўзимни менга нисбатан уюштирилган айбловдан ҳимоя қиламан, деб ўйлагандим. Бироқ суд мажлисидан сўнг бу ерда мен билан бирга ўтирган айрим одамлардан ҳам ҳимояланишга мажбурлигим ҳақидаги хулосага келдим. Гап шундаки, суд жараёни бошланганидан бери Ҳаётхон Насриддинов ва Равшан Салаев томонидан руҳий босим кўрсатилмоқда, ҳақоратлар ёғдирилмоқда», — деди Бобомурод Абдуллаев.
Суд мажлисида раислик қилаётган судья Зафар Нурматов судланувчиларни бир-бирларини ҳурмат қилиш ва айбсизлик презумпцияси тамойилига риоя этишга чақирди.
Шунингдек, Бобомурод Абдуллаев кўрсатмалар бераётган чоғида бошқа судланувчилар аралашмасликлари ва изоҳ бермасликларини назорат қилишни сўради.
Изоҳ (0)