Тожикистон билан чегарадош Ховос туманининг энг чекка Ховособод маҳалласига бу йилги баҳор, Наврўз ўзгача файзу барака олиб келди, деб хабар беради Сирдарё вилояти ҳокимлиги ахборот хизмати.
Қишлоқдаги 26 километр ички йўлларга тош тўкилиб, созланди. 12 та икки қаватли уйлар капитал таъмирдан чиқарилди. Чириган газ қувурлари янгиларига алмаштирилиб, хонадонларда «зангори олов» порлай бошлади. Синган, ишдан чиққан симёғочлар ўрнига янгилари ўрнатилди, Кўчаларга электр ёритгичлар қўйиб чиқилди. Қўрғондаги 4-умумтаълим мактаби, катта стадион, ёзги дам олиш клуби таъмирланди. Қишки клуб, болалар боғчасини таъмирлаб, созлаш ишлари давом эттирилаяпти. Кўчалар, йўлларнинг бўйлари, аҳоли томорқаларига 15 минг тупдан зимёд мевали дарахт, гул кўчатлари ва арча ўтқазилди. 11 та кам таъминланган оилаларнинг уйлари ҳомий ташкилотлар томонидан таъмирлаб берилди.
«Қисқа даврда олиб борилган катта қурилиш, ободонлаштириш ишлари қишлоқнинг қиёфасини бутунлай ўзгартириб юборди. Кечагина қаровсиз бўлган, ташландик ҳолга келиб қолган ‘Ховособод’ бугун обод ва гўзал гўшага, яшаш тарзи, туриш-турмуши янгиланган, шаҳарлардагидан қолишмайдиган масканга айланди», — дейилади хабарда.
«Ховособод» маҳалласида бўлиб ўтган Наврўз байрамига бағишланган байрам тадбирида вилоят ҳокимлиги вакиллари, вилоят ташкилотларининг раҳбарлари, кекса отахон ва онахонлар, бунёдкорлик ишларида фаол қатнашган Ховос тумани, Тожикистон Республикасининг Суғд вилояти, Зафаробод тумани вакиллари, бир гуруҳ меҳмонар иштирок этди.
Вилоят ҳокими Ғофуржон Мирзаев ва Ўзбекистон Президенти Давлат маслаҳатчисининг биринчи ўринбосари Улуғбек Муҳаммадиевлар ховосободликларни бугун барча шарт–шароитларга эга, шаҳарлардек гўзал қишлоқда яшаш бахтига эга бўлганликлари, Наврўз қишлоқ аҳлига ўзгача шоду хуррамлик олиб келганлиги билан чин дилдан қутлаб, уларнинг оилаларига омонлик, турмушларига янада фаровонлик, ўзбек ва тожик халқлари ҳамжиҳатлигига бардавомлик тиладилар.
Байрам шодиёнаси ховосободликлар учун чинакам тўйга айланиб кетди. Даврага ёш келин-куёв Жамшид Умрбоев ва Мадина Умрбоевалар алоҳида жиҳозланган электромобилда кириб келишди. Таниқли санъаткорлар Фарҳод Саидов, Ҳосила Раҳимова, вилоятнинг кўзга кўринган хушовоз хонандаларининг дилрабо қўшиқлари тадбир иштирокчиларигнинг хурсандчилигига хурсандчилик қўшди.
Изоҳ (0)