Бир неча кун аввал Кенияда Судан лақабли дунёдаги энг сўнгги эркак шимол оқ каркидони ўлди. Дунёда бу турдаги атиги иккита урғочи каркидон қолди. «Vesti Finance» сўнгги 20 йил ичида қирилиб кетган ҳайвонларга эътибор қаратди.
Хитой дарё дельфини
Хитой дарё дельфини 1918 йилда Хитойдаги чучук сувли Дунтин кўлида топилган. Ҳаворанг-кулранг дельфиннинг узунлиги 1,4 — 2,5 метрни, вазни 42 — 167 килограммни ташкил қилган. Урғочиси эркагидан кўра каттароқ бўлган.2006 йилда экспедиция бу турни топа олмаган. Хитойнинг йўқолиб кетган ҳайвонлар бўйича комиссияси бу турни 2017 йилда қирилиб кетган деб эълон қилди.
Тайвань кулранг леопарди
Тайвань кулранг леопарди ташқи кўриниши ва жисмоний тузилиши жиҳатдан Хитойнинг материк қисмида яшаётган қондошларига ўхшаган. У вазни 20 килограммни ташкил қилувчи дарахтларда яшайдиган йиртқич бўлган.Куланг леопардни сўнгги марта 1983 йилда кўришган, уч йилдан сўнг эса тадқиқотчилар бу йиртқичнинг изларини топа олмаган. Саноатнинг ривожланиши ва ўрмонларнинг кесилиши сабабли леопардлар тоғларга чиқиб кетишга мажбур бўлган, у ерда эса браконерлар таъқибига учраган.
2000 йилда олимлар йиртқични топиш учун охирги марта уриниб кўрган, бироқ ҳеч қандай изни топа олмаган.
Океан ўрдаги
Ўрдак Тинч океанидаги фақат учта оролда яшаган. Океан ўрдаклари Иккинчи жаҳон урушидан кейин қишлоқ хўжалиги эҳтиёжлари учун ботқоқларнинг қуритилиши оқибатида қирилиб кетган.
Хитой узунбурун балиғи
Хитой узунбуруни чучук сувларда яшаган энг йирик балиқ бўлган. Унинг узунлиги уч метргача, вазни эса 300 килограммгача етган.Хитойлик олимлар 2006—2008 йилда балиқни ёввойи табиатда излаб топишга ҳаракат қилган, бироқ турнинг бирорта вакилини топа олмаган.
Пиреней эчкиси
Ўрта асрларда ёввойи эчки Пиреней яриморолида жуда кўп учраган, бироқ уларнинг популяцияси назоратсиз ов сабабли XIX—ХХ асрда тезлик билан қисқарган.ХХ асрнинг иккинчи ярмида бу ҳудудда фақатгина кичик популяция сақланиб қолган, 2000 йилда эса турнинг сўнгги вакили ўлик ҳолда топилган.
Камерун қора каркидони
Қачонлардир Африканинг кўплаб мамлакатларида кенг тарқалган Камерун қора каркидони ов ва браконерлик оқибатида 2000 йилга келиб қирилиб кетиш ҳолатига келди. 2011 йилда тур йўқ бўлиб кетган деб эълон қилинган.
Кариб монах-тюлени
«Денгиз бўриси» деб аталган Кариб монах-тюлени Кариб ҳавзасида яшаган энг йирик тюлень тури бўлган. Ҳаддан ортиқ ов ва озуқа манбасининг йўқ бўлиши турнинг қирилиб кетишида асосий сабаб бўлган. Тур сўнгги марта 1952 йилда кузатилган ва 2008 йилда расман йўқ бўлиб кетган деб тан олинган.
Шарқ пумаси
Шарқ пумаси қачонлардир Шимолий Американинг шимолида яшаган ва қирилиб кетган пума тури ҳисобланади. Бу тур АҚШнинг балиқ ресурслари ва ёввойи табиатни муҳофаза қилиш хизмати томонидан 2011 йилда қирилиб кетган деб тан олинган.
Улкан кабоверд калтакесаги
Калтакесаклар оиласининг ягона гигант вакили Африканинг ғарбий томонидаги оролларда яшаган. У ҳозирги кунда бутунлай қирилиб кетган ҳисобланади.
Кичик поганка
Кичик поганка ёки Мадагаскар қизилбўйин поганкаси кичик поганкалар оиласига киради. Қушнинг овозини сўнгги марта 1988 йилда эшитишган. 2010 йилда эса у расман қирилиб кетган деб тан олинган.
Изоҳ (0)