Узун туманидаги Боботоғ давлат ўрмон хўжалиги ерларида 30 минг гектарда писта плантациялари ташкил этилади. Унинг 2,5 минг гектари жорий йилда, қолгани 2020 йилгача тайёр бўлади, 2 минг иш ўрни яратилади. Бу ҳақда ЎзА хабар берди.
Қайд этиш жоизки, Сурхондарё вилоятининг тоғ ва тоғ олди ҳудудларида фойдаланилмайдиган ер майдонларида ҳар йили ўртача 350 гектаргача пистазорлар барпо этишга мўлжалланмоқда.
Шу кунларда Ўрмон хўжалиги давлат қўмитаси Боботоғда Германия халқаро ҳамкорлик жамияти ва FAO билан бирга амалга ошираётган лойиҳалари доирасида пистачиликни ривожлантириш, мавжуд писта дарахтларини ҳосилдорлигини ошириш ва пайванд қилиш бўйича кўргазмали семинар ўтказмоқда.
Мазкур семинарда ўз тажрибаси билан ўртоқлашган Туркиянинг Газиантеп пистачилик институти олими Мехмет Узун ўз таассуротларини сўзлаб берди.
«Биз Боботоғдаги мавжуд 30 гектар пистазорни айланиб кўрдик. Бу ердаги дарахтларнинг яримидан кўпи эркак навлар. Уларни илмий жиҳатдан кузатиб, эрта ва кеч гуллайдиганларини аниқлаб, пайванд қилиш керак.
Бизда писта дарахтлари маданий тарзда парваришланади. Дарахтни бутаб, унга агротехник ишлов берамиз. Писта биринчи йилларда, секин ривожланади. Буни суғориш йўли билан тезлаштириш мумкин. Бу борада муваффақиятга эришиш учун пистанинг ўзига хос хусусиятларини билиш зарур. Қоидаларга амал қилиб, энг сифатли ва мўл писта ҳосилини етиштирамиз. Ундан яхшигина даромад ҳам кўрамиз.
Ўзбекистонда эса писта кўчатларига ҳеч қандай ишлов берилмас экан. Экилган кўчатлар ўз ҳолига ташлаб қўйилгани боис кам ҳосил берар экан. Албатта, парвариш бўлмагандан кейин натижа ҳам шунга яраша бўлади-да.
Дарахтлар етти йилда нишона кўрсатсада, минг ёшгача мева беради. Меваси нафақат ички, балки жаҳон бозорида ҳам юқори баҳоланади. Бир неча кундан буён соҳага қизиқаётганлар билан учрашиб, махсус ишлов бериш ва пайванд қилиш сирларини ўргатаяпмиз. Агар барча агротехник тадбирлар тавсияларимиз асосида ўз вақтида бажарилса, ҳозирда 100 грамм ҳосил бераётган 20 ёшдаги дарахт кейинги йил 3 килограмм, ундан кейин яна кўпроқ ҳосил бера бошлайди. Шу тариқа ҳосилдорлик йилдан йилга битта дарахтда 30 килограммдан ошади».
Ўрмончилик мутахассисларнинг айтишича, бир гектар ерда 150-180 та писта дарахти экиш мумкин. 50 даражагача иссиққа ва 41 даражагача совуққа чидайди. Ҳосилдор нав бўлса ва тўлиқ ҳосилга кирса, битта дарахт 100 килограммдан ортиқ ҳосил берар экан. Ҳосил яхши бўлганда йилига ўртача 100 миллион сўмдан ортиқ даромад кўриш мумкин.
Изоҳ (0)