Telegram мессенжери асосчиси ва раҳбари Павел Дуров компания назорати остидаги мессенжерни блоклаш борасидаги таҳдидларга таслим бўлмаслигини маълум қилди, деб хабар берди «РБК».
«Telegram фойдаланувчиларининг шахсий маълумотлари тақдим этилмаса, уни блоклаш билан қилинаётган таҳдидлар ҳеч қандай самара бермайди. Telegram шахсий ҳаёт даҳлсизлиги ва эркинлигига путур етказмайди», — деб ёзади Дуров ўзининг Twitter’даги саҳифасига.
20 март, сешанба куни Россия Олий суди Telegram Messenger’нинг Федерал хавфсизлик хизмати томонидан мессенжер фойдаланувчиларининг ёзишмаларига оид шифр калитларини талаб қилганлиги борасидаги даъвосини рад этди.
Шундан сўнг «Роскомнадзор» Telegram 15 сутка ичида калитларни топшириши лозимлигини маълум қилди, алоқа вазири Николай Никифоров эса компания суд қарорини бажаришга ва Россия қонунларига бўйсунишга мажбур эканлигини таъкидлади.
ФХХ ўтган йилнинг июлида Telegram’дан фойдаланувчилар ёзишмалари ҳақида маълумотларни талаб қилганди. Бироқ компания ушбу маълумотларни тақдим этишдан бош тортган. Дуровнинг айтишича, ФХХнинг талаби россияликларнинг конституцион ҳуқуқини поймол қилмоқда.
Изоҳ (0)