Ўзбекистон Ёшлар иттифоқи ҳамда Ўзбекистон енгил атлетика федерацияси билан ҳамкорликда 20 март куни «Наврўз» умумхалқ байрами муносабати билан Тошкент шаҳрининг марказий кўчаларида 21 километр масофадан иборат «Наврўз — 2018 марафони» бўлиб ўтди.
Ўзбекистон Мудофаа вазирлиги томонидан хабар берилишича, марафонда Қуролли кучлар ҳарбий хизматчилари, уюшмаган ёшлар, таълим муассасалари ўқувчи ва талабалари, фахрийлар, ота-оналар ҳамда оммавий ахборот воситалари ходимлари иштирок этди.
Ёшларнинг бўш вақтини мазмунли ташкил этиш, улар орасида соғлом турмуш тарзини тарғиб қилиш, ўзаро маданий-спорт алоқаларни йўлга қўйиш ҳамда жисмоний тарбия ва спортни ёшларнинг кундалик турмуш тарзига киритиш, соғлом рақобат муҳитини яратиш мақсадида ташкил қилинган марафон росмана байрамона тусда ўтди.
Марафонда иштирок этиш истагида бўлган 16 ёшдан 30 ёшгача кўнгилли ёшлар ҳамда фахрийлар учун махсус сайт яратилган эди. Белгиланган режалар ўзининг муносиб самарасини берди. 2018 метр, 3 ва 21 километр масофаларда ғолибликка даъвогарлик қилган иштирокчилар ўзларининг чиниққанлик даражаларини намоён қилди.
Мудофаа вазирлиги Спорт клуби аъзоларидан олти нафари ғолиблар сафидан ўрин олди. Жумладан, 2018 метрга югуриш бўйича биринчи ўрин Қуролли кучлар хизматчиси Нурхон Муҳиддиновага насиб этди. Уч километр масофага югуришда Мудофаа вазирлиги Спорт клуби аъзоси Жаҳонгир Раҳматуллиев иккинчи ўринни эгаллади. 21 километр масофага югуришда аёллар орасида мутлақ ғолибликни Мудофаа вазирлиги Спорт клуби аъзоси Тамилла Кучкарова қўлга киритди.
Эркаклар орасида 21 километр масофага югуришда уччала совринли ўрин ҳам Мудофаа вазирлиги вакиллари — Шоҳруҳ Давлатов (1-ўрин), Владислав Мамедов (2-ўрин), Ортиқ Рамазоновга (3-ўрин) насиб этди. Марафон ғолиблари фахрий ёрлиқ ҳамда велосипед билан тақдирланди.
Изоҳ (0)