Ўзбекистон Президентининг 2017 йил 17 ноябрдаги «Ўзбекистон Республикаси Қуролли Кучларида ёшларга оид давлат сиёсати самарадорлигини янада ошириш бўйича қўшимча чора-тадбирлар тўғрисида»ги 3394-сон қарори билан Мудофаа вазирлигида 96 та, Миллий гвардияда 41 та, Давлат божхона қўмитасида 18 та, Ички ишлар вазирлигида 9 та, Давлат хавфсизлик хизмати чегара қўшинларида 45 та, Фавқулодда вазиятлар вазирлигида 18 та, жами 227 та Ёшлар иттифоқининг бошланғич ташкилотлари ташкил этилиши режалаштирилган.
Мудофаа вазирлиги матбуот хизматининг хабар қилишича, Ўзбекистон Ёшлар иттифоқи Марказий кенгаши томонидан Қуролли Кучлар тузилмаларига кирувчи вазирлик ва идоралари билан имзоланган икки томонлама қўшма қарорларга асосан, иттифоқнинг ҳарбий қисм ва муассасалардаги бошланғич ташкилотларининг низоми ва ташкилий тузилмалари тасдиқланган. Бошланғич ташкилотларда 4 та йўналишлар, яъни Маданий-маърифий ва ҳуқуқий тарғибот йўналиши, Ижтимоий-иқтисодий йўналиши, Ҳарбий-ватанпарварлик ва оммавий спорт йўналиши, Устоз-шогирд йўналиши бўйича жами бугунги кунга қадар 900 нафар сардорлар сайланган.
Ўзбекистон Ёшлар иттифоқи Марказий кенгаши томонидан ҳарбий қисмлар Ёшлар иттифоқи бошланғич ташкилотларининг моддий базасини такомиллаштиришда ҳам амалий ёрдам берилмоқда. Жумладан, Тошкент вилояти ва Тошкент шаҳрида жойлашган ҳарбий қисмлардаги бошланғич ташкилотларнинг намунали фаолиятини ташкил этиш учун 28 миллион сўмлик намунавий деворий стендлар, 50 миллион сўмлик тарқатма материаллар, шунингдек, 15 та компьютер жамланмаси ва 24 минг дона бадиий адабиётлар ажратилган.
Қуролли Кучлар академиясида Мудофаа вазирлиги марказий аппарати ҳамда ҳарбий округлар миқёсида қўшинларда ёшларга оид давлат сиёсати самарадорлигини янада ошириш масалаларига бағишланган видеоселектор йиғилишда юқорида таъкидланган масалалар тўғрисида маълумотлар билдирилиб, дуч келинаётган муаммоли ҳолатлар ва уларнинг ечими, истиқболдаги режалар, шунингдек ёшлар иттифоқининг ҳарбий қисм ва муассасалардаги бошланғич ташкилотлари фаолиятларини ташкил этишда ва секторлар йўналишлари бўйича олиб борилаётган ишларда учраётган камчиликлар ва муаммолар муҳокама қилинди.
Шунингдек видеоселектор йиғилишида Ўзбекистон Ёшлар иттифоқи билан ҳамкорликда олиб борилаётган ишлар, Ўзбекистон Ёшлар иттифоқининг Марказий ва ҳудудий кенгашларида ташкил этилган ҳарбий қисмдаги ёшлар билан ишлаш бўлимлари билан ҳамкорликда янада жадаллаштириш масалалари, бошланғич ташкилоти етакчилари ва сардорларнинг билими, интилиш ва фаолликларини ошириш бўйича тадбирлар белгиланди.
Изоҳ (0)