Наманган вилоят соғлиқни сақлаш бошқармаси раҳбарияти томонидан тизимдаги даволаш-профилактика муассасалари раҳбарлари ва ходимларига нисбатан талабчанлик тобора кучайтирилмоқда. Жорий йилнинг дастлабки ойларида вилоят бўйича ўз вазифасига нолойиқ 30 га яқин тиббиёт ходими ишдан бўшатилиб, улар ўрнига ташаббускор ва ташкилотчи мутахассислар тайинланди. Бу ҳақда «Дарё»га бошқарма ахборот хизмати маълум қилди.
Жумладан, Косонсой тумани тиббиёт бирлашмасининг раҳбарияти тўла таркиб билан, яъни бирлашма бошлиғи Б.Холдоров, унинг ўринбосари Р.Абдуллаев, координатор М.Тошматов, марказий поликлиника мудири М.Каримова, поликлиника бош фелдшери А.Абдуллаев ўз вазифасига совуққонлик билан қарагани учун вазифасидан озод этилди.
Шунингдек, Наманган тумани кўп тармоқли марказий поликлиникаси мудири Н.Қосимова, шу тумандаги 14-қишлоқ оилавий поликлиникаси мудири Н.Ирисова, Тўрақўрғон тумани тиббиёт бирлашмасига қарашли «Шоҳидон» қишлоқ врачлик пункти мудири З.Хушматова, Норин тумани тиббиёт бирлашмасига қарашли 18-қишлоқ оилавий поликлиникаси мудири Г.Шамсутдиновага нисбатан ҳам шундай чора қўлланилди.
Оналик ва болалик муҳофазасига доир вазифаларни бажаришдаги масъулиятсизлиги, берилган топшириқлар ижросига беписандлик билан муносабатда бўлганлиги оқибатида туманда болалар ва гўдаклар ўлими кўрсаткичлари ортиб кетишига йўл қўйганлиги учун Тўрақўрғон ва Мингбулоқ туманлари тиббиёт бирлашмалари бошлиқларининг оналик ва болалик муҳофазаси бўйича ўринбосарлари З. Зокирова ҳамда О.Қўлдошев, Поп тумани тиббиёт бирлашмаси туғруқхона бўлими мудири Ш.Латифова, туғруқ бўлими акушер-гинекологи М.Эгамбердиева ва навбатчи ҳамшираси Г.Нурматова ҳам вазифасидан бўшатилди.
Шунингдек, бирламчи тизимда қониқарсиз иш ташкил этаётган шифокор ва ҳамширалар билан ҳам муросасозлик муҳитига барҳам берилмоқда. Улар йўл қўяётган камчиликларни тузатиш билан бирга, ўзларига нисбатан тегишли ташкилий ва интизомий чоралар кўриб борилмоқда.
Жумладан, Чуст туманидаги 44, 45, 46-қишлоқ оилавий поликлиникаси мудирлари А.Турғунов, М.Халилова, Ҳ.Лутфиллаевга ўртача ойлик иш ҳақининг 50 фоизи миқдорида жарима солинди. Янгиқўрғон тумани тиббиёт бирлашмасига қарашли 58-қишлоқ врачлик пункти мудири М.Турсунбоева, Наманган шаҳридаги кўп тармоқли марказий поликлиниканинг акушер-гинекологи М.Якуббоева, 1, 10, 13-оилавий поликлиникалари умумий амалиёт шифокорлари Ш.Ортиқбоев, V.Саломов, Н.Мавлонова, М.Нишонова, А.Сиддиқова, М.Ибрагимов, Учқўрғон тумани тиббиёт бирлашмасининг 39-қишлоқ оилавий поликлиникаси мудири М.Зайниддиновага ҳайфсан берилди.
Изоҳ (0)