2017 йили Термиз туманида афғонистонлик тадбиркорларга сифатли хизмат кўрсатадиган «Термиз карго» экспорт маркази ташкил этилиб, зарур қулайлик яратилди. Консуллик вакили, божхона терминали биноси, омборлар бунёд этилди. Мазкур марказ товар ишлаб чиқарувчилар ва ишбилармонлар билан афғонистонлик тадбиркорлар, сармоядорлар доирасининг ҳамкорлик алоқаларини кенг йўлга қўйишда муҳим омил бўлди, деб ёзади ЎзА.
2018 йил январь ойида Термиз туманида Ўзбекистон Республикаси Олий ва ўрта махсус таълим вазирлиги ҳузурида Афғонистон фуқароларини ўқитиш таълим маркази фаолият бошлади.
«Ўзбек ва афғон халқи қадимдан битта дарёнинг икки қирғоғида яшаган яқин қўшнилардир, — дейди Афғонистоннинг Шибирғон шаҳридан келган Қодирий Абдураззоқ. — Жиянимнинг бироз тоби қочган экан, ўйлаб ҳам ўтирмай, шундоқ Амударёдан ўтиб, шаҳрингиздаги касалхонага олиб келавердик. Тез кунда соғлиғи тикланди. Шифокорлар жавоб берамиз, деб туришибди. Термиз шаҳрида ҳам замонавий тиббиёт юксак даражада ривожланганини кўриб, жуда мамнун бўлдик. Юртингиздаги тинчлик, ободлик ва сўнгги йилларда юз бераётган янгиланишларга ҳавас қиламиз. Бундан бир неча йил аввал Ўзбекистонга ўтиш учун чегарада ортиқча расмиятчиликларга дуч келганмиз. Бу сафар ана шу муаммоларга чек қўйилганидан ҳам қувондик. Биз, Ўзбекистоннинг афғон юртидаги вазиятни сиёсий йўл билан ҳал этиш, тинчликни таъминлаш, барқарорликни тиклаш ва иқтисодиётни ривожлантириш тарафдори бўлиб келаётганини жуда қадрлаймиз. Иқтисодий, савдо, таълим, маданий-гуманитар ва бошқа соҳалардаги алоқаларимиз мустаҳкамланиб бораётганидан фахрланамиз».
Қўшни давлатда барқарорликни тиклаш, иқтисодиётини юксалтириш тарафдори бўлиб келаётган Ўзбекистон Афғонистондаги тоғ-кон саноати, қурилиш, энергетика, таълим соҳаларидаги лойиҳаларни рўёбга чиқаришда қатнашаётир. Ўзбекистон ёрдами билан афғонистонликлар учун юқори вольтли электр энергияси ва оптик толали кабел линиялари, сув таъминоти тармоғи, кўприклар, темир йўл бунёд этилган. Нефть маҳсулотлари, электр энергияси, минерал ўғитлар, полиэтилен қоп, озиқ-овқат, қадоқлаш халталари ва бошқа халқ истеъмоли моллари экспорт қилинмоқда.
Сурхондарё вилояти ҳокимлигидан олинган маълумотларга кўра, 2018 йилдан бошлаб East West Surxon МЧЖ шаклидаги қўшма корхона, «Сурхондарёдонмаҳсулотлари» АЖ, «Сурхон Экспорт Савдо», «Сурхон Импорт Экспорт Агро» агрофирмалари, Surxon Golden Trade МЧЖ каби бир қатор хўжалик юритувчи субъектлар Афғонистондаги озиқ-овқат маҳсулотлари тақчиллигининг олдини олишга кўмаклашаётир. Улар қўшни давлатдаги буюртмачиларига ун, мева-узум, сабзавот, майиз, қатиқ, дуккакли ва бошқа табиий, арзон, сифатли озиқ-овқат маҳсулотларини етказиб бермоқда.
«Хомкон-Шеробод Тараққиёт» фермер хўжалиги, «Жарқўрғон парранда», «Ангор Сурхон Гурури» МЧЖлари томонидан сассиқ коврак, парранда тухуми ва ер ёнғоқ каби маҳсулотларни экспорт қилиш йўлга қўйилгани сурхондарёлик тадбиркорлар билан афғон ишбилармонларининг ўзаро ҳамкорлик алоқалари мустаҳкамланиб бораётганидан далолатдир.
Изоҳ (0)