Бош прокуратура ҳузуридаги Мажбурий ижро бюроси фаолиятини бошлаган 10 ой давомида давлат инспекторларига қаршилик кўрсатиш билан боғлиқ 121 та ҳолат қайд этилди. Бу ҳақда «Газета.uz» хабар бермоқда.
Мазкур ҳолатларнинг 56 таси бўйича жиноий иш қўзғатилди, 20 нафар шахс бюро ходимларига тан жароҳатлари етказгани учун озодликдан маҳрум этилди.
Жумладан, Самарқанд вилоятининг Булунғур туманида яшовчи шахсга суд 3 йил ахлоқ тузатиш ишларини тайинлади. У 7,5 миллион сўм қарздорлик учун уйни электр тармоғидан узиш учун келган бюро ходимини калтаклаганди.
Наманган вилоятининг Норин туманида ҳам шунга ўхшаш ҳолат қайд этилди: қарздор эркак қариндоши билан бирга инспекторга ташланди. У касалхонага етказилди, ҳуқуқбузарга эса жиноий иш очилди.
17 февраль куни Қашқадарё вилоятининг Косон туманидаги касалхонага электр тармоғига ноқонуний уланган дўконни аниқлаган бюро ходими етказилди. Акт тузиш чоғида савдо нуқтаси эгасининг дўсти инспектор билан жанжаллашиб, унга пичоқ урди. Жабрдийданинг ҳаёти сақлаб қолинди, ҳужум қилган шахс эса жиноий жавобгарликка тортиладиган бўлди.
Маълумот учун, жорий йил январь ойида бюро томонидан жами 3,135 триллион сўм қарздорлик ундирилди. Бундан 2,166 триллион сўм табиий газ, 924 миллиард сўм электр энергияси, 45,3 миллиард сўм ичимлик суви истеъмоли учун қарздорликка тўғри келди.
Изоҳ (0)