Олий Мажлис Қонунчилик палатасидаги Ўзбекистон «Миллий тикланиш» демократик партияси фракциясининг йиғилиши бўлиб ўтди. Унда фракция аъзолари, қонун лойиҳалари бўйича масъул ташкилотлар, фракция экспертлари, партия фаоллари ҳамда ОАВ вакиллари иштирок этди, деб хабар беради палата ахборот хизмати.
Фракция раҳбари С. Отамуратов бошқарган йиғилишда ижтимоий-сиёсий аҳамиятга эга бўлган бир қатор қонун лойиҳалари биринчи ва иккинчи ўқишда кўриб чиқилди.
Жумладан, «Автомобиль йўллари тўғрисида»ги Ўзбекистон Республикаси Қонунига ўзгартиш ва қўшимчалар киритиш ҳақида»ги, «Ташувчининг фуқаролик жавобгарлигини мажбурий суғурта қилиш тўғрисида»ги Ўзбекистон Республикаси Қонунига ўзгартиш ва қўшимчалар киритиш ҳақида»ги қонунлар лойиҳаси кўриб чиқилди.
Фракция аъзолари «Ўзбекистон Республикасининг айрим қонун ҳужжатларига қўшимча ва ўзгартишлар киритиш тўғрисида»ги қонун лойиҳасини биринчи ўқишда муҳокама қилди. Мазкур қонун лойиҳасининг қабул қилиниши энергетик ичимликларни 18 ёшга тўлмаган шахсларга реализация қилишни чеклашни кўзда тутади.
Шунингдек, ҳужжат уларнинг рекламаси ва савдосини давлат ҳокимияти ва бошқаруви органлари бинолари, жамоатчилик жойлари, соғлиқни сақлаш ва таълим муассасалари ҳамда спорт, ижтимоий ва маданий тадбирларда аудио, визуал ва мультимедиа воситалари, матн, кўргазмали қўлланмалар, баннерлардан фойдаланган ҳолда амалга оширишни чеклаш, белгиланган тартибни бузганлик учун маъмурий жавобгарликка тортиш каби масалаларни ҳам ўз ичига қамраб олади.
Йиғилишда бошқа бир қатор қонун лойиҳалари кўриб чиқилди ҳамда партия фракциясининг тегишли қарори қабул қилинди.
Изоҳ (0)