Президент Шавкат Мирзиёевнинг Олий Мажлисга мурожаатномаси матни Бишкекда қирғиз тилида китоб шаклида чоп этилди. Бу ҳақда Ўзбекистон ТИВ матбуот хизмати
маълум қилди.
Фото: Ўзбекистон ТИВ матбуот хизматиКитоб тақдимоти икки давлат ўртасида дипломатик муносабатлар ўрнатилганининг 25 йиллигига бағишланган «Қирғизистон—Ўзбекистон ҳамкорлиги ривожланишининг янги уфқлари» мавзусидаги илмий-амалий конференция доирасида бўлиб ўтди.
Конференция ишида Қирғизистон ташқи ишлар вазирининг биринчи ўринбосари Динара Кемелова бошчилигидаги ТИВ вакиллари, Қирғизистоннинг фавқулодда ва мухтор элчилари, ТИВ Дипломатик академияси, Стратегик тадқиқотлар миллий институти, «Манас» қирғиз-турк университети, Қирғизистон Миллий университети, Қирғизистон давлат университети, Қирғизистон халқаро университети раҳбарлари ва профессор-ўқитувчилари иштирок этди.
Тадбирда видео-конференция алоқаси орқали Ўш давлат университети раҳбарияти, ўқитувчилари ва халқаро алоқалар факультети талабалари қатнашди.
Дипломатик академиянинг «Халқаро муносабатлар ва ҳуқуқ» кафедраси профессори, элчи Ирина Оролбаева таъкидлаганидек, Ўзбекистон Президенти мурожаатномаси матни қирғиз тилида чоп этилиши Қирғизистон жамоатчилигига қўшни мамлакатнинг муҳим сиёсий ҳужжатини ўз она тилида ўрганиш имконини беради.
«Мурожаатноманинг асосий қисмларини диққат билан ўрганиб, Қирғизистон ва Ўзбекистонда ривожланиш учун бир йўл мавжуд деган хулосага келдим. Шавкат Мирзиёевнинг кўпчилик таклифлари Қирғизистон учун ҳам ўта долзарб», — дея таъкидлади И. Оролбаева.
Изоҳ (0)