Ўзбекистонлик халқаро гроссмейстер Гулруҳбегим Тоҳиржонова Малайзияда ўтган халқаро турнир ғолибасига айланди, деб ёзди «Оламспорт».
Аёллар байрами арафасида Куала-Лумпур First Friday Masters March—2018 турнирига мезбонлик қилган бўлиб, унда Ўзбекистон, Малайзия, Мьянма, Филиппин, Ҳиндистон, Вьетнам каби мамлакат шахматчилари чемпионлик учун кураш олиб борди. Регламентга кўра, мусобақа 9 та турдан иборат бўлиб, унда шахмат усталари айланма усулда куч синашиб чиқиши керак эди.
Гулруҳбегим 9 та имкониятнинг ҳеч бирида имкониятни бой бермади. У 4 та ўйинни ўз фойдасига ҳал қилган бўлса, яна 5 тасида дуранг қайд этди. Натижада 6,5 очко жамғаришга эришди. Қўшимча кўрсаткичлари рақобатчилариникидан яхшироқ бўлгани учун, бош мукофот айнан Тоҳиржоновага насиб этди.
Гулруҳбегим Тоҳиржонова ўзбекистонлик биринчи аёл гроссмейстер Нафиса Мўминованинг синглисидир.