Маълумотларга кўра, Олмазор туманидаги «Охунгузар» жоме масжиди 1850 йилда қурилган. Ушбу масжид ўзининг тарихийлиги ва қурилиш услуби билан ажралиб туради. Тарихий масжиднинг ёнида жойлашган уйнинг аянчли ҳолати масжидга ташриф буюрувчилар ва хорижлик сайёҳларнинг дилини хира қилиши турган гап. Бу ҳақда Ўзбекистон мусулмонлари идораси расмий сайтига жойланган хабарда айтилади.
Мамлакатда сайёҳлик соҳасига берилаётган эътибор, бу сингари кичик камчиликлар сабабли тўсиқларга учрамаслиги зарур, дейилади хабарда. Бундай нураб кетган деворлар ҳам масжид аҳлига, ҳам хориждан келадиган сайёҳларга салбий таъсир этиши аниқ. Ким ҳам нураган деворни кўриб, бино ичига киради? Масжид ходимлари эса кунига юзлаб сайёҳларга: бу масжид жуда мустаҳкам деб, тушунтира олмайдилар-ку.
Келган сайёҳ масжид ҳолати яхши бўлса-да, ёнбошида турган уй деворининг йиқилай деб турганини кўриб, ушбу обидани зиёрат қилиш ниятидан қайтмаслигига ким кафолат беради?!
Ўзбекистон мусулмонлари идораси мутасадди ташкилот ва мазкур уй вакилларини мавжуд ҳолат бўйича тегишли чора кўришга чақириб қолди.
Изоҳ (0)