Тошкент халқаро аэропортида такси чақириш учун инфокиосклар ўрнатиш режалаштирилмоқда. Бу ҳақда 28 февраль, чоршанба куни бўлиб ўтган Халқаро пресс-клуб мажлисида пойтахт ҳокимининг инвестициялар, инновациялар ва туризмни ривожлантириш масалалари бўйича ўринбосари Алишер Тиллаев айтиб ўтди, деб ёзади «Газета.uz».
«Биринчи навбатда биз аэропортга инфокиосклар қўймоқчимиз, туристлар у ерга мурожаат қилиб, такси чақира олади, — деди Алишер Тиллаев. — Аэропорт ҳудудида такси вакиллари ишлайди. Автотураргоҳга биз таксичиларни тартибсиз равишда қўймаймиз. Таксини мобил дастур орқали чақириш мумкин бўлади. Унда албатта таксометр ва қатъий белгиланган, шаффоф нархлар бўлиши керак».
Ҳоким ўринбосари Туризмни ривожлантириш давлат қўмитаси билан кўп қаватли автотураргоҳ қуриш имконияти кўриб чиқилаётганини айтди. «Миллий авиакомпания автотураргоҳ учун ер ажратиб бериши билан, бу масалани бир-икки ойда ҳал қилиш мумкин», — деди Алишер Тиллаев.
«Ўзбекистон ҳаво йўллари» бош директори биринчи ўринбосари вазифасини бажарувчи Умид Ҳасанов қўшимча қилишича, аэропорт вокзал олди майдонида такси хизматларини қонуний равишда тақдим этувчи компаниялар учун жой ажратилади.
Изоҳ (0)