Тошкент аэропортида маҳаллий линиялар эски терминали негизида иккинчи аэровокзал мажмуаси қурилмоқда. Бу ҳақда «Ўзбекистон ҳаво йўллари» бош директори биринчи ўринбосари вазифасини бажарувчи Умид Ҳасанов Халқаро пресс-клуб мажлисида маълум қилди, деб ёзади «Газета.uz».
Ўтказиш қобилияти соатига 500 йўловчини ташкил қилувчи аэровокзал икки ой ичида ишга туширилади. Бу ерда йўловчиларнинг божхона ва чегара назоратидан тезкорлик билан ўтиши учун барча шароитлар яратилади. Жорий халқаро терминал «мавжуд камчиликлар бартараф қилинган ҳолда» ўз ишини давом эттиради.
Йўловчилар етарли миқдордаги юк аравачалари билан таъминланади. Тўртта юк тасмаларини ишга тушириш режалаштирилмоқда, уларнинг тепасида юк етиб келган рейс кўрсатилади.
«Технологик жараёнлар даражаси халқаро стандартларгача етказилади», — дея таъкидлади «Ўзбекистон ҳаво йўллари» раҳбарияти вакили.
Аввалроқ Тошкент халқаро аэропортида такси чақириш учун инфокиосклар ўрнатиш ва кўп қаватли автотураргоҳ қуриш режалаштирилаётгани хабар берилган эди.
Изоҳ (0)