Ўзбекистон Президентининг қарори билан Ички ишлар вазирининг маслаҳатчиси лавозими жорий этилди, дея хабар бермоқда ИИВнинг Жамоатчилик ва оммавий ахборот воситалари билан алоқалар бошқармаси.
Янги лавозим «ички ишлар органларида ёш кадрлар салоҳиятини ошириш тизимини яратиш, уларнинг касбий маҳоратини юксалтириш учун ҳурмат ва обрўга эга бўлган ходимларнинг ички ишлар органларидаги бой амалий тажрибасидан фойдаланиш» мақсадида жорий этилган.
Хабар беришларича, ушбу лавозимга Зокиржон Алматов тайинланган. Бу ҳақдаги буйруқ ички ишлар вазири Пўлат Бобожонов томонидан имзоланган.
Вазир Пўлат Бобожонов 27 февраль, сешанба куни вазирлик шахсий таркибини Зокиржон Алматов ИИВ раҳбарига маслаҳатчи этиб тайинлангани ҳақидаги буйруқ билан таништирган.
Қайд этишларича, Зокиржон Алматов «ҳаётий бой тажрибага эга, кўп йиллар давомида республикамизда жиноятчиликнинг олдини олиш, жамоат тартибини сақлаш, мамлакатда тинчлик ва осойишталикни таъминлашга катта ҳисса қўшган».
ИИВдан маълум қилишларича, генерал-полковник Зокиржон Алматов 1991—2006 йилларда ички ишлар вазири лавозимида ишлаган, сўнг нафақага кузатилган эди.
Изоҳ (0)