Сурхондарё вилояти Жарқўрғон туманидаги Соқчи маҳалласида яшовчи Қайтмас Айиғов ички ишлар идорасига мурожаат этиб, (исм-шарифлар ўзгартирилган) 2013 йил декабрь ойида деновлик Аъзам Азаматовга Бухоро давлат тиббиёт институтига қўшимча контракт асосида ўқишга киритиб қўйиш шарти билан берган 70 миллион сўм пулини қайтариб ололмаётганини маълум қилган, деб хабар берди ЎзА.
Мурожаат юзасидан олиб борилган тезкор-суриштирув ишлари чоғида аниқланишича, Қайтмас Айиғов 2013 йил декабрь ойида деновлик Аъзам Азаматов билан танишиб қолган. 32 ёшдаги бу шахс ўзини Тошкент шаҳрида диний экстремизм бўйича Миллий хавфсизлик хизматида ишлайман, деб таништирган. Гап орасида Бухоро давлат тиббиёт институтининг тест синовларидан етарли балл тўплай олмаган Қайтмас Айиғовнинг қўшимча контракт асосида ўқиш учун ҳужжат топширганини эшитиб, йигирма ёшдаги абитуриентнинг ишончига кириб, унга Бухоро шаҳридаги ҳамкасб дўстлари орқали ёрдам беришини айтган. Бунинг эвазига харажатлари учун нақд 70 миллион сўм пулини алдов йўли билан олган.
Айни вақтда мазкур иш юзасидан суриштирув ишлари олиб борилмоқда.
Изоҳ (0)