Трамп: Обамани сайловларга эҳтимолий аралашув ҳақида огоҳлантиришган, аммо у чора кўрмаган

АҚШда 2016 йилда бўлиб ўтган сайловларга нафақат россияликлар, балки бошқа томонлар ҳам аралашган бўлиши мумкин. Бундай тахмин билан АҚШ президенти Дональд Трамп чиқиш қилди, деб ёзади «ТАСС». У ўзидан олдинги президент Барак Обамани сайлов кампаниясига ташқи аралашув эҳтимоли ҳақида огоҳлантирилганига қарамай, ҳеч қандай чора кўрмаганликда айблади.

«Бир нарсани айтишим керак: Обама аралашув билан боғлиқ воқеалар давомида президент бўлган, бу россияликлар, эҳтимол бошқалар иштирокида ҳам бўлган, — деди Трамп. — У бу ҳақда қайғуриши керак эди, аммо у бундай қилмади». «У огоҳлантирилган эди, бироқ ҳеч нарса қилмади. Бу ундан ҳам ёмон», — деб қўшиб қўйди у.

Шу билан бирга, Трамп ўз штабининг Россия ҳукумати билан қандайдир махфий келишуви борлиги ҳақидаги гапларни яна бир бора рад этди. «Мен ҳеч кимга қўнғироқ қилмаганман, ҳеч қанақа учрашувлар уюштирмаганман, ҳеч нарса. Ҳеч қанақа тил бириктириш йўқ, мен буни сўраган ҳар қандай одамга айтаман», — дея таъкидлади президент.

Нашр эслатишича, Москва АҚШдаги сайлов жараёнларига аралашишга уринишлари ҳақидаги барча даъволарни кўп бора рад этган.