Самарқанд шаҳридаги Алишер Навоий номидаги истироҳат боғи кириш қисмида темир панжаралар олиниб, айрим аттракционлар боғнинг бошқа ҳудудига кўчирилмоқда. Бу ҳақда «Зарафшон» нашри хабар берди.
Бу қандай тараддуд эканлигига Самарқанд шаҳар ҳокими ўринбосари Б. Элмуродов қуйидагича изоҳ берди:
— Бу ерда ўзбек ва тожик адабиётининг буюк намоёндалари — Алишер Навоий ва Абдураҳмон Жомийнинг ҳайкали ўрнатилиб, атрофи обод этилади. Ушбу икки улуғ мутафаккир ҳайкали илгари Самарқанд шаҳридаги «Афросиёб» меҳмонхонаси ёнида, кўримсиз жойда эди. Кейинчалик ҳайкал у ердан кўчирилди. Шаҳар жамоатчилиги, зиёлилар ва ижодкорларнинг таклифи билан ҳайкал учун мана шу жой танланди. Бу маскан танланиши бежиз эмас: ҳайкал ўрнатиладиган маскан Абдураҳмон Жомий кўчаси ёнида экани, Алишер Навоий номи билан аталадиган истироҳат боғи ҳудудида жойлашиши билан алоҳида аҳамият касб этади. Қолаверса, форс-тожик адабиётининг яна бир йирик вакили Абу Абдулло Рудакий ҳайкали ўрнатилган майдон ҳам ушбу истироҳат боғига туташиб кетган.
Қисқа фурсатда амалга оширилиши белгиланган қурилиш лойиҳасига кўра, ҳайкал ўрнатиладиган майдон боғнинг 30-35 сотих ерини эгаллайди. Ҳайкал атрофида фавворалар, орқа томонида бир неча устунли арка бунёд этилади. Майдон четида гулхона ва майсазорлар ташкил қилинади, ноёб манзарали дарахт кўчатлари ўтқазилади.
Изоҳ (0)