Ўзбекистон ҳукуматининг давлат ва хўжалик бошқаруви органлари ахборот хизматлари фаолиятини янада такомиллаштиришга оид қарори қабул қилинди.
Ҳужжатда жисмоний ва юридик шахсларнинг давлат ва хўжалик бошқаруви органлари фаолияти тўғрисидаги ахборотни излаш, олиш ва тарқатишга доир ҳуқуқларини таъминлашга қаратилган нормалари ижросини таъминлаш мазкур идораларнинг энг устувор вазифаларидан бири эканлиги қайд этилди. Давлат ва хўжалик бошқаруви органи раҳбари ушбу вазифалар амалга оширилиши учун шахсан масъул эканлиги белгилаб қўйилди.
Давлат ва хўжалик бошқаруви органларининг ахборот хизмати тўғрисидаги намунавий низом тасдиқланди. Ахборот хизмати (матбуот хизматлари, жамоатчилик билан алоқалар хизматлари) давлат ва хўжалик бошқаруви органи ходимларининг умумий сони доирасида ташкил этилиши ҳамда шу орган раҳбарига бевосита бўйсунадиган алоҳида мустақил бўлинма ҳисобланиши белгиланди.
ОАВ билан ўзаро ҳамкорлик, доимий ҳамкорликда ишлайдиган журналистлар доирасини шакллантириш, орган фаолиятини хорижий ОАВда сифатли ёритиш мақсадида Ўзбекистоннинг хорижий мамлакатлардаги ваколатхоналари, шунингдек, хорижий мамлакатларнинг Ўзбекистондаги дипломатик ваколатхоналарини ахборот материаллари (кино, фото, аудио ва видеоматериаллар, босма маҳсулотлар) билан таъминлаш уларнинг асосий вазифалари қаторига киритилди.
Давлат ва хўжалик бошқаруви органларига Ўзбекистон матбуот ва ахборот агентлиги билан биргаликда 3 ой муддатда ахборот хизматлари раҳбарлари ва ходимларини аттестациядан ўтказиш, хизматларни журналистлар, жамоатчилик билан алоқаларни ташкил этиш ва бошқа соҳалардаги юқори малакали мутахассис кадрлар билан таъминлаш, замонавий моддий-техник базани шакллантириш бўйича «йўл хариталари»ни ишлаб чиқиш топширилди.
Ахборот хизматларига ОАВ вакиллари билан, жумладан, давлат ва хўжалик бошқаруви органлари раҳбарлари иштирокида мунтазам равишда (ойда камида бир марта) матбуот анжуманлари, брифинглар ўтказиш мажбурияти юкланди.
Изоҳ (0)