Тошкентдаги Инҳа университетида ҳарбий хизматчилар учун мураббий-ўқитувчилар тайёрлаш курслари очилди. Ҳарбийлар у ерда замонавий ахборот-коммуникация технологияларини ўзлаштириши мумкин, деб хабар берди ЎзА.
Бундай курслар Ўзбекистон Республикаси Ахборот технологиялари ва коммуникацияларини ривожлантириш вазирлиги ҳамда Мудофаа вазирлиги ташаббуси билан ташкил этилди. Курсларнинг ўқув дастури илғор компьютер ва ахборот-коммуникация технологиялари, шунингдек, ҳарбий хизматчиларнинг профессионал фаолиятида қўлланилувчи услуб ва усулларни ўрганишни талаб қилади. У олти босқичдан иборат бўлиб, ҳар бир босқичда 60 нафар ҳарбий хизматчи иштирок этади. Келгусида ўз қисм ва бўлинмаларида машғулотлар олиб борувчи 360 нафар мураббий-ўқитувчини тайёрлаш кўзда тутилган.
Тошкентдаги Инҳа университети ва Муҳаммад ал-Хоразмий номидаги Тошкент ахборот технологиялари университетининг тажрибали ўқитувчилари раҳбарлигида ҳарбий хизматчилар қатор фойдали кўникмаларни ўзлаштиради, жумладан, киберхавфсизликка қарши кураш ва педагогика соҳасидаги билимларини оширади.
Имтиҳонларни муваффақиятли топширган тингловчилар ахборот-коммуникация технологиялари соҳасида мураббий-ўқитувчи мақомини берувчи сертификатга эга бўлади.
Изоҳ (0)