Ўзбекистон «Миллий тикланиш» демократик партияси фракцияси аъзоси Назир Собиров Бухоро вилояти Ғиждувон туманининг Сарвари, Тавариён, Зарангари, Абдулла Қаҳҳор ҳамда Қўрғон маҳалла фуқаролар йиғинларида бўлиб, аҳоли вакиллари билан юзма-юз, очиқ мулоқотлар ўтказди. Бу ҳақда Парламент қуйи палатаси расмий веб-сайтига асосланиб, ЎзА хабар берди.
Сарвари маҳалла фуқаролар йиғинидаги 54-сон мактабгача таълим муассасаси ўрганилганда муассасанинг дори-дармон воситалари билан тўлиқ таъминланмаганлиги аниқланди. 100 нафар бола тарбияланаётган 13-сон мактабгача таълим муассасаси эса 2016 йилда капитал таъмирланган бўлса-да, муассаса ошхонасида ўрнатилган электр печи уланмаган, канализация оқова тизими йўқ. Ушбу камчиликлар сабаб овқат ҳовлида, ўчоқда тайёрланмоқда. Туман электр тармоқлари ва молия бўлими билан боғланиб, масала ечими ижобий ҳал этилди.
Учрашувлар давомида аҳоли ҳудудда тоза ичимлик сувининг йўқлиги ва умуман етиб келмаганлиги, йўлларни таъмирлаш зарурлиги қайд этди. Муаммолар юзасидан мутасадди ташкилотлар раҳбарларига тегишли топшириқлар берилди.
Шунингдек, Тавариён маҳалла фуқаролар йиғини фуқаролари яшаб келаётган ҳудудидан шаҳар марказигача бўлган масофада транспорт йўлга қўйилишини сўраб мурожаат этди. Депутат кўмагида туман ҳокимлиги томонидан Тавариён йўналиши бўйича тендер танлови ўтказилиб, жорий йилнинг 20 апрель кунига қадар автобус қатнови йўлга қўйилиши аҳолига маълум қилинди.
Тумандаги Абдулла Қаҳҳор маҳалла фуқаролар йиғинига қарашли Тўқимачилар кўчасидаги кўп қаватли уйларда яшовчи аҳоли томонидан ширкат раҳбаридан ва тўловлардан норозилик юзасидан эътирозлар билдирилди. Ушбу масалалар юзасидан ширкат раҳбарини ўзгартириш ва тўловларни камайтириш борасида Қонунда белгиланган тартибда иш кўриш лозимлиги борасида тушунтириш ишлари олиб борилди.
Изоҳ (0)