Бухоро вилояти Ғиждувон туманида туғилган 10 ёшли Амирбек Мансуров ҳозирда оғир бетоб. Қарийб уч ойдан бери у лейкоз деб аталувчи оғир касаллик билан курашмоқда.
Инсон ўзи ва яқинлари ҳаётида эртага нималар юз бериши мумкинлигини олдиндан кўра олмайди. Бир неча ойлар аввал Амирбек барча тенгдошлари каби мактабда ўқиётган, келажакда жаҳон чемпиони бўлиш орзуси билан спортнинг бокс тури билан шуғулланаётган эди. Шундай кунларнинг бирида Амирбек ва унинг оиласининг бахтли ҳаёти остин-устун бўлиб кетди.
Ўша куни Амирбек спорт машғулотларидан қайтаётган эди. Йўлни кесиб ўтаётганида қўққисдан келиб қолган велосипедчи уни уриб юборди. Амирбек қаттиқ қўрқиб кетди. Ҳодиса оқибатида унинг боши ёрилди. Ҳаммаси айнан шу воқеадан сўнг бошланди. Аввалига болага Гепатит А ташхиси қўйилди. Амирбек бир неча кун дарсларга ва спорт мусобақаларига қатнаша олмади. Гепатит муолажалари тугаганидан сўнг у яна дарсга қатнай бошлади. Аммо орадан бироз вақт ўтгач, унинг аҳволи ёмонлашди. Амирбек ҳолсизлана бошлади, иштаҳаси йўқолди. Хавотирга тушган ота-онаси уни зудлик билан шифохонага олиб борди. Шифокорлар Амирбекда гемоглабин миқдори ўта камайиб кетганини маълум қилди. Бола реанимация бўлимига ётқизилди. Унга қон қуйилди. Бироқ ушбу муолажа ҳам Амирбекнинг оёққа туришига ёрдам бермади. Шифокорлар унинг қонида оққон таначаларининг кўпайиб кетганидан хавотирга тушиб, болани зудлик билан Тошкент шаҳридаги гематология ва қон қуйиш илмий-текшириш институтига юборди. Пойтахтдаги тиббий муассасада ҳам қўрқинчли ташхис ўз тасдиғини топди: Ўткир лейкоз, фаол даври, лимфобласт тури.
Шундан буён тенгдошлари қатори таълим оладиган, ўйнаб-куладиган ёшдаги Амирбек тўшакка михланган. У куннинг аксарият қисмини томчи дори остида, шифтга термулиб ўтказади.
Бунинг устига Амирбекнинг онаси Нодира Мардонова ҳам саратонга чалинган. Ҳозирда оила Тошкент шаҳрида ижара уйда яшайди. Оила бошлиғи рафиқаси ва ўғлининг даволаниш харажатларидан ташқари ҳар ой ижара учун 150 АҚШ доллари тўлайди. Унинг сўзларига кўра, ўғлининг дори-дармонларига пул топа олмай, узоғини яқин қилаётган, оила тебратишида асқотаётган машинасини ҳам сотиб юборган. У яқин кунларда хорижий давлатлардан бирига ишлаш учун кетишни режалаштирмоқда.
Шифокорлар Амирбек яна икки йил давомида даволаниши зарурлигини маълум қилган. Бунинг учун эса катта маблағ талаб этилади. Масалан, унга ёзиб берилган биргина Аспаргиназа препарати 1 миллион 700 сўм туради. Амирбекка ушбу уколдан 18 та қилиниши керак.
Бир олам орзулар билан ҳаёт учун курашаётган Амирбекдан ёрдамингизни аяманг! Унга имкон қадар ёрдам берайлик!
Хайрия қилмоқчи бўлганлар учун:
Халқ банки Ғиждувон филиали рекзвизитлари:
ИНН: 201 148 244
23120000300000666100
Пластик карта рақами (Click, Payme) 8600 0609 8163 7128 Карта Амирбекнинг онаси Нодира Мардонова номига очилган.
Онасининг телефон рақами: +998905131994
Изоҳ (0)