Тошкентда ўғриликларнинг 0,5 фоизи тунги клубларда, 1 фоизи масжидларда содир этилган

19 февраль куни «Ўзбекистон» телеканалида эфирга узатилган «Муносабат» кўрсатувининг навбатдаги сони ўғриликнинг олдини олиш ва унга қарши курашишга бағишланди.

ИИВ академиясида ташкил этилган илмий-амалий тадқиқотлар маркази таҳлилларига кўра, Ўзбекистонда содир этилаётган жиноятларнинг 28 фоиздан ортиғи ўғрилик жиноятини ташкил этади. Тадқиқотлар маркази Тошкент шаҳар кесимида 559 та ўғриликни ўрганиб чиқиб, ўғриликлар содир бўлаётган жойларни таҳлил қилди.

Таҳлилларга кўра, энг кўп ўғрилик хонадонларда содир бўлмоқда — жами ўғриликларнинг 20,8 фоизи. Ундан кейинги ўринларни подъездлар (17,3%) ва бозорлар (13,3%) эгаллади.

1 фоиз ўғрилик масжидларда амалга оширилган. Энг кам ўғрилик содир этилган жойлар рўйхатига шунингдек, истироҳат боғлари (0,7%), меҳмонхоналар (0,7%), тунги клублар (0,5%), чойхоналар (0,5%) ва дорихона (0,2%) кирди.