2017 йилнинг мартидан буён Инвестициялар бўйича давлат қўмитасига раислик қилиб келаётган Азим Аҳмадхўжаев Ахборот технологиялари ва коммуникацияларини ривожлантириш вазири этиб тайинланди. Бу ҳақда «Газета.uz» ҳукуматдаги манбасига таяниб, маълум қилди.
Ахборот технологиялари ва коммуникацияларини ривожлантириш вазирлигига бунга қадар раҳбарлик қилиб келган Шерзод Шерматов инновацион ривожланиш вазирининг ўринбосари этиб тайинланди. Янги вазирликка ўтган йилнинг 29 ноябрида асос солинганди.
Инвестициялар бўйича давлат қўмитасига бош вазир ўринбосари, Инвестициялар, инновацион ривожлантириш, эркин иқтисодий ва кичик саноат зоналари фаолиятини мувофиқлаштириш, туризм масалалари комплекси раҳбари Суҳроб Холмуродов раҳбар этиб тайинланди. У ўзининг бош вазир ўринбосари лавозимини сақлаб қолди.
Азим Аҳмадхўжаев 1979 йилда туғилган. 2002 йилда Тошкент давлат иқтисодиёт университетини тамомлаган. 2016 йилнинг май ойидан 2017 йилнинг мартига қадар «Асака» банкини бошқарган. Бунга қадар Ўзбекистон Ташқи иқтисодий фаолият миллий банки бошқаруви раиси ўринбосари, сўнг раиснинг биринчи ўринбосари лавозимларида ишлаб келган.
Шерзод Шерматов 1977 йилда туғилган. Тошкент давлат техника университети (1998) ва АҚШнинг Йель университетини тамомланган (2000). 2016 йилнинг ноябридан 2017 йилнинг февралига қадар Ахборот технологиялари ва коммуникацияларни ривожлантириш вазирининг биринчи ўринбосари лавозимларида ишлаган. Унга қадар 2014 йилдан Тошкентдаги Инҳа универитетига ректорлик қилган.
Изоҳ (0)