Ўзбекистон Ёшлар иттифоқи ёшларга амалий кўмак бериш мақсадида янги лойиҳани эълон қилди. Бу ҳақда иттифоқ раиси Қаҳрамон Қуронбоевнинг Facebook’даги саҳифасида маълум қилинди.
Лойиҳа бутун республика бўйлаб «Мамлакат тараққиётига ҳисса қўшишга тайёр тур» шиори остида ўтказилади.
Лойиҳа доирасида маҳорат дарслари, ижодий ва очиқ мулоқотлар, давра суҳбатлари, «Уйма-уй» лойиҳаси, учрашувлар, кўчма кино ва театр труппалари намойишлари, фермер ва тадбиркорлар учун саёҳатлардан иборат жами 1500 га яқин тадбир ўтказилиши режалаштирилган.
Тадбирларга психологлар, лидерлар, шоир-ёзувчилар, маданият, санъат соҳаси вакиллари, тадбиркорлар, ҳунармандлар, ёш фермерлар, олимлар жалб этилади.
Лойиҳага Андижон вилоятида старт берилади. Ёшлар иттифоқи марказий кенгаши раиси ва раис ўринбосарлари, бўлим мудирлари, мутахассислар, ташкилот тассарруфидаги 30 га яқин ННТлари раҳбарлари ва вакиллари бир ҳафта давомида Андижон вилоятининг барча туман ва қишлоқларида бўлади. Вақтинча ишсиз ёшлар бандлигини таъминлаш бўйича хусусий сектор вакиллари билан шартномалар тузилиб, 500 нафарга яқин ёшларнинг бандлигини таъминлаш режалаштирилган.
«Ушбу ҳафталик давомида ҳудуддан имтиёзли кредит сўраган ёшларнинг талаби тўлалигича қондирилади. Ижтимоий ҳимояга муҳтож ёшлар учун мотивация бўла оладиган болалар билан мулоқотлар ўтказилиб, уларга Ёшлар ташкилоти томонидан тикув машиналари, 3 минг дона бадиий китоб, озиқ-овқатлар, турли ўқув қуроллари, ногирон болалар учун ўйинчоқлар тақдим этилади», — дейилади хабарда.
Изоҳ (0)