Халқаро футбол уюшмаси (ФИФА) расмий сайти ўзбек футболи сўнгги вақтларда қўлга киритаётган ютуқлардан келиб чиқиб ёзилган мақола эълон қилди.
«Ўзбекистон Осиё футболининг ‘уйқудаги’ гиганти» деб номланган пост Ўзбекистон U23 терма жамоасининг Осиё Чемпионатида қўлга киритган ғалабасидан кейин ёзилган. ФИФА мақоласида айтилишича, ёшлар футболидаги бу каби ютуқлар келажак учун пойдевор эканлиги билан аҳамиятлидир.
«Оқ бўрилар» Осиёда ҳар доим ўз ўрнига эга бўлиб келган. Ўзбекистон U23 термаcининг қитъа чемпионатида эришган ғалабаси келажакка умид беради. Чунки Равшан Ҳайдаров жамоаси намойиш этган ўйин услуби ва қўлга киритган натижа бутун Осиёни лол қолдирди.
Мусобақанинг энг яхши футболчиси деб Одил Ҳамробеков топилди. Унинг етакчилигида тўп сурган футболчилар Япония, Жанубий Корея каби кучли жамоалар дарвозасига 4 тадан гол уришга муваффақ бўлди. Эндиликда бу футболчилар Ўзбекистон миллий терма жамоасининг асосини ташкил этиши кутилмоқда.
Бош мураббий Равшан Ҳайдаров Хитойдаги ғалаба ўзбек футболидаги муваффақиятларнинг бошланиши экани ҳақида айтди:
Биз тарих яратдик. Хитойдаги ғалаба ўзбек футболи тарихидаги энг ёрқин онлардан бири сифатида эътироф этилади. Бунда ҳамманинг бирдек ҳиссаси бор. Фикримча, Осиё Чемпионатидаги муваффақият келгуси ғалабалар учун пойдевор бўлиб хизмат қилади. Бу жамоа Ўзбекистон келажагидир.Равшан Ҳайдаров, Ўзбекистон U23 бош мураббийи
Халқаро майдонда ҳам ўзбек футболига бўлган ҳурмат нисбатан ошди. Буни Ўзбекистон миллий термасининг ЖЧ—2018 иштирокчилари бўлган Сенегал, Марокаш, Эрон каби жамоалар билан ўртоқлик ўйини ўтказиш борасида келишувга эришганидан ҳам билса бўлади. Ҳозир ўзбекистонликларнинг асосий мақсади бош жамоанинг Қатар—2022 мундиалида иштирок этишидир.
Мамлакатнинг турли ёш термалари ўз вақтида Мексика, Туркия, БАА, Янги Зеландия мамлакатларида бўлиб ўтган кичик Жаҳон Чемпионатларида қатнашганди. Демак, уларда келажакка умид кўзи билан қараш учун асос бор.
Изоҳ (0)