Ijtimoiy tarmoqlarda “Andijonlik 23 yashar yigit militsiya so‘rog‘idan keyin o‘z joniga qasd qildi” sarlavhasi bilan tarqatilgan maqolada keltirilgan holatlar Andijon viloyati Ichki ishlar boshqarmasi tomonidan o‘rganildi, deb xabar beradi IIV matbuot xizmati.
O‘rganish jarayonida ma’lum bo‘lishicha, fuqaro Ismoiljon Baltabayev o‘z arizasida 2017-yilning fevral oyida hajga borishi yuzasidan yordam berish uchun Abdurahim Sattarovga 1700 dollar, 11 million so‘m pullari va fuqarolik pasportini berganligini, lekin Abdurahim Sattarov turli bahonalar bilan ziyoratga jo‘natishga yordam bermasdan, pullarini ham qaytarmaganligini bayon qilingan.
22-yanvar kuni soat 18:25 da fuqaro Abdurahim Sattarov tergov bo‘limiga chaqirtirilib, u bilan suhbat o‘tkazilganda Ismoiljon Baltabayevdan 1700 dollar 11 million so‘m pullarini qarzga olganligini va pullarni qaytarish uchun Qozog‘istonga borib ishlab kelganligini bildirib, Ismoiljon Baltabayevning fuqarolik pasportini tergov bo‘limi surishtiruvchisi G‘. Ismonovga qaytarib bergan.
Qo‘shimcha tergovga qadar tekshiruv davomida fuqaro Abdurahim Sattarovning fuqarolik pasportida 2017-yilning oktabr-noyabr oylarida Qozog‘istonga chiqib kelganligi haqida qozoq tilida yozilgan muhr bosilgani aniqlangan. Muhrning haqiqiyligini tekshirish maqsadida, Abdurahim Sattarovning fuqarolik pasporti tegishli tartibda hujjatlashtirilib olingan va shu kuni soat 18:45 da Andijon shahar IIB binosidan chiqarib yuborilgan.
23-yanvar kuni soat 04:00 da Andijon viloyati tez tibbiy yordam shifoxonasidan Andijon shahar IIB navbatchilik qismiga kelib tushgan xabarga asosan, Abdurahim Sattarov yashash xonadonida ko‘p miqdorda “Dimedrol” tabletkalarini ichib olganligi va hushsiz holda oila a’zolari tomonidan shifoxonaga olib borilgani ma’lum bo‘lgan.
Fuqaro Abdurahim Sattarovga nisbatan O‘zbekiston Respublikasi Jinoyat kodeksining 168-moddasi (firibgarlik) 1-qismi bilan jinoyat ishi qo‘zg‘atilib, dastlabki tergov harakatlari olib borilmoqda.
Izoh (0)