Қорақалпоғистон Республикаси Ички ишлар вазири ўринбосари Шукурилло Аюбов хизмат фаолиятида дуч келган нохуш ҳодиса ҳақида сўзлаб, бу каби ҳолатларнинг олдини олиш учун нима қилиш лозимлиги ҳақида маслаҳат берди, дея хабар қилади «KRuz.uz».
«Иш фаолиятим давомида соҳам нуқтайи назаридан кўплаб ҳодиса ва воқеаларни, яъни содир бўлган ёнғинлар, йўл траспорт ҳодисалари жойларига чиқиб унда жабрланганлар ёки моддий ва маънавий жиҳатдан талафот кўрганларни кўриб ич ичингдан ачиниб кетасан киши.
Ҳозирги тўхталиб ўтадиган мавзум кундалик турмушимизда учраб турадиган, оддий бўлса-да лекин жуда зарур бўлган айрим хонадонларда назарга олинмаган қоидаларнинг бирига эътиборингизни жалб қилмоқчи эдим. Фикримни бошлашдан олдин ушбу қоидани яхшироқ ёритиш мақсадида бир неча йиллар олдин хизмат фаолиятим давомида бўлиб ўтган бир ҳодисани айтиб бермоқчиман.
Кунларнинг бирида тез тиббий ёрдам бўлимига тонг соат 6:00 ларда 6 та турли ёшдаги фуқароларнинг ис газидан заҳарланиб тушганлиги ҳақида хабарни олиб, тезда касалхонага, сўнг воқеа жойига чиқиб кетдик. Воқеа жойини кўздан кечирганимизда, ушбу хонадонда бир кун олдин марака бўлганлиги, тадбирга узоқ-яқиндан қариндош уруғлари меҳмон бўлиб келганликлари ва кеч кирганда онда-сонда кириладиган бир уйга тезда чет давлатда ишлаб чиқарилган печни ўрнатиб, мўрисини шундоқ дерезадан ташқарига чиқариб қўйиб меҳмонлар дам олиши учун жой қилиб берганликларини аниқладик.
Шу ўринда уйнинг қурилишига алоҳида эътибор қилиб хонага ташқаридан ҳеч қаердан ҳаво кирмаганлиги, хона эшиги охирги марта саоат 23:00 ларда очилиб ёпилганлигини ва газ печидаги газнинг яхши ёнмаганлиги, тутун мўрисининг том сатҳидан юқорига чиқарилмагани натижасида хонанинг бутун ҳажмини ис гази эгаллаганини, меҳмонлардан бирининг кўнгли айниб чала жон сифатида бирдан уйқусидан уйғониб, қолганларни ҳам уйғотганини аниқладик.
Кўздан кечириш вақтида кўзим эшик ва деразаларни ёғочдан эканлиги ва улар узоқ йиллик қуёш тафтидан қуриб ром оралари очилиб қолганлигига тушди.
Ҳа, шу кичгина бўлсада тирқишлар бўлмаганида эди, уёғини сўраб ўтирманг. Ушбу тирқишлардан кирган тоза ҳаво тонг саҳаргача ис газини бутун хонанинг ҳажмини эгаллаб олишига йўл қўймаган экан. Тез тиббий ёрдам бўлимидаги меҳмонлар 3—4 соатлик муолажадан сўнг соғайиб ўз уйларига қайтишди. Демак, ўша кичгина бўлса-да дераза эшик роми орасидан кирган маълум бир тоза ҳаво инсонларни ҳаётини сақлаб қолишда катта ҳисса қўшган.
Воқеа тафсилотини шу ерда тугатиб, аниқ мақсадга кўчмоқчиман. Илгарилари ота боболаримиз қурган уйлариннинг хоналарида қалдирғоч учун ёки бошқа мақсадда керак бўлиб қолар дея битта бўлсада туйнук қолдиришган. Шунинг учунми анча тетик ва соғлом юришган. Бугунги кунда аксарият қишлоқ уйларида фуқароларимиз замонавий қурилиш материалларидан ўзларининг табларига хуш келадиган қилиб иморатлар қуришмоқда. Аммо кимдир ушбу шамоллатиш қурилмасини ўрнатаётган бўлса, кимдир хонанинг кўркини бузади ёки нима учун керак деган маънода қуришга этибор беришмайди. Қурилиш меъёр талаблари асосида қурилаётган уйларда ушбу талаб лойиҳага киритилган бўлиб шу меъёр асосида қурилади. Шунинг учун содир бўлиши мумкин бўлган чақнаш ёки ис газидан заҳарланиш асосан қурилиш меъёр талабларига риоя қилмай ўзбошимчалик билан қурилган уйларда кўплаб учрайди.
Ис гази ҳаводан енгил бўлиб хонани юқори қисмидан пастга қараб тўлдириб келади. Шунинг учун шамолатиш қурилмасини хонанинг энг юқори нуқтасига ўрнатиш мақсадга мувофиқ ҳисобланади. Ушбу қурилма мавжуд уйда заҳарланиш ва чақнаш кузатилмагани билан бир қаторда хонанинг таъмирга келиш муддати ҳам узаяди. Чунки хонада ҳар хил газлар — печдан чиққан маълум бир тутунлар хона деворларини қорайтирмайди. Шу билан бир қаторда ушбу хонада дам олган инсон чарчоқларсиз соғлом уйғонади. Хулоса қилиб айтганда, сизнинг хонадонингиз иқтисодий томондан кўмак, хавфсиз ва соғлом яшашингизга ўз ҳиссасини қўшади. Қурилмани қуриш бўйича туғиладиган саволларга жойлардаги ёнғин хавфсизлиги ходимларидан йўриқнома олиш мумкин», — деди Шукурилло Аюбов.
Изоҳ (0)