Наманган вилоятидаги давлат нотариал идора нотариуслари томонидан 2017 йилнинг ноябрь ойидан ҳозирги кунга қадар вилоятдаги барча туман ва шаҳарлардаги 453 та маҳалла фуқаролари йиғинларда давра суҳбатлари ўтказилди, деб хабар беради Наманган вилояти адлия бошқармаси матбуот хизмати.
Шунингдек, фуқароларнинг яшаш хонадонларига борган ҳолда сайёр тартибда 420 та нотариал ҳаракатлар амалга оширилди.
Нотариуслар томонидан ўтказилган давра суҳбатлари жараёнида нотариал ҳаракатларни амалга ошириш тартиби, талаб қилинадиган ҳужжатлар, мерос ишларини расмийлаштириш, васиятнома бериш, автотранспорт воситаларини бегоналаштиришда алданиб қолмаслик, автотранспорт воситасини бошқариш ва сотиш ҳуқуқи билан ишончномалар ва бошқа ҳаракатларни расмийлаштириш ҳамда ҳуқуқбузарлик профилактикаси юзасидан тушунтириш ишлари олиб борилган.
«Мазкур тадбирлар вилоятдаги барча нотариуслар томонидан вилоятнинг барча туман (шаҳар)ларида, олис чекка қишлоқларида ўтказилиб, асосий мақсад вилоят аҳолисининг оғирини енгил қилиш, фуқаролар ҳуқуқлари, эркинликлари ва қонуний манфаатларининг реал ҳимоя қилинишини таъминлашга йўналтирилган. Бу каби тадбирлар йил давомида доимий равишда ўтказиб борилади», — дейилади хабарда.
Изоҳ (0)