2017 йил инвестиция дастури доирасида соғлиқни сақлаш вазирлиги тизимидаги 181 та даволаш-профилактика муассасаларида 552,6 миллиард сўмлик қурилиш-таъмирлаш ишлари амалга оширилди, деб хабар беради вазирлик ахборот хизмати.
«Жорий йилда бу соҳадаги ишларни янада кенгайтириш, хусусан, вазирлик тизимидаги 310 та тиббиёт иншоотларида қурилиш, реконструкция, капитал таъмирлаш ва уларни жиҳозлаш учун 803,6 миллиард сўм маблағ ажратилиши режалаштирилди», — дейилади хабарда.
Шунингдек, тиббиёт олий таълим муассасалари битирувчиларини мақсадли йўналтиришга алоҳида эътибор қаратилмоқда. Шу мақсадда жорий йил январь ойида тиббиёт олий таълим муассасаларининг 7-босқич бакалавриат битирувчилари якуний давлат аттестациясидан ўтказилди ва улардан 1811 нафари умумамалиёт шифокори сифатида ишга йўлланма олди.
Бунинг натижасида Қорақалпоғистон Республикаси, Андижон, Бухоро, Самарқанд, Хоразм вилоятлари ва Тошкент шаҳрида умумий амалиёт шифокорига бўлган вакансиялар тўлиқ қопланди.
«Бундан ташқари, 926 нафар 2-босқич клиник ординатура битирувчиларидан 907 нафарини тор соҳа мутахассиси сифатида ишга жойлаштириш ҳисобига тор доирадаги мутахассисларга бўлган вакансиялар яна қисқаради. Шунингдек, бу йил тиббиёт олий ўқув юртларида бакалавриатура йўналишида таълим олаётган 6-босқич талабалар ҳам ўқишни якунлаб ишга йўл олади. Ўтказилаётган ушбу амалий саъй-ҳаракатлар натижасида жорий йилда умумий амалиёт шифокорлиги бўйича бўш ўринлар 82 фоиз, тор мутахассисликлар бўйича эса 55 фоиз қопланиши кутилмоқда», — дейилади хабарда.
Изоҳ (0)