Шавкат Мирзиёевнинг 2017 йил 27 ноябрдаги «Ўзбекистон Республикасининг Биринчи Президенти, буюк давлат ва сиёсат арбоби Ислом Абдуғаниевич Каримов таваллудининг 80 йиллигини нишонлаш тўғрисида»ги қарори ижроси доирасида Фарғона вилоятида ҳам турли маънавий-маърифий тадбирлар ўтказилмоқда, деб ёзади ЎзА.
Хабарда таъкидланишича, бугун Фарғонага келган меҳмон бўладими ёки хорижлик сайёҳ, албатта, Ислом Каримов номидаги Театр-концерт саройига ташриф буюради. Биринчи Президент ташаббуси билан барпо этилган мазкур санъат саройи Фарғона аҳли учун азиз туҳфалардан бири сифатида янада қадрли, дейилади хабарда.
Фарғона азалдан маданият ва санъат ўчоғи сифатида ном қозонган. Мазкур санъат маскани ҳам бу анъаналарни янгича мазмунда давом эттиришга хизмат қилмоқда. Бугун Фарғонада ўтказиладиган кўплаб тадбирлар ана шу масканда ташкил этилмоқда. Театр жамоаларининг спектакллари, санъаткорларнинг байрам дастурлари намойиш қилинмоқда. Бу санъат масканига келган киши ўзига катта маънавий руҳ, мадад олиб қайтади.
– Биринчи Президентимизнинг олижаноб фазилатлари барчамиз учун ибрат мактаби бўлиб қолди, – дейди Ўзбекистон Қаҳрамони Ботиржон Темиров. – Айниқса, Фарғона шаҳридаги мислсиз бунёдкорлик ишлари бевосита у кишининг ташаббуси билан амалга оширилди. Шаҳримиздаги санъат саройи ана шулардан бири. У киши бу масканнинг қурилишига бош-қош бўлди. Биринчи Президентимиз вилоят фаоллари билан учрашувида «мазкур санъат саройи битса, сизлар билан ўтириб, «Фарғона тонг отгунча»ни бир эшитаман», деб ният қилган эдилар. Бу сарой барчамиз учун азиз маскан сифатида у кишини доимо эслатиб туради.
Изоҳ (0)