Тошкентлик тадқиқотчи тадбиркор Равшан Асомитдинов бир неча йиллик изланишлари самарасида қарийб 0,7 гектарда тибет қора гуручини етиштириб, Ўзбекистон шароитида 500 килограмм ҳосил олди, деб хабар беради ЎзА.
Комбайндан фойдаланганда шолининг сифатига салбий таъсир бўлгани учун шолини бандидан сифатли ажратадиган қўлбола ускуна ҳам ясалди.
«Соҳа вакилларининг маълум қилишларича, қора гуруч антоцианин (кучли антиоксидант), Б витамини, ниацин, Е витамини, кальций, магний, марганец, темир ва рухга бой бўлиб, қадимда фақатгина император дастурхонига тортилган. Пиширилганда сиёҳрангга кирувчи бу гуручни истеъмол қилиш оддий халққа тақиқланган», — дейилади хабарда.
Оқланмаслиги сабабли, гуруч ўзида барча дармондориларни сақлаб қолади. Шунинг учун ҳам хитойликлар қора гуручни камқонлик, кўз касалликлари, соч тўкилиши, организм қаришининг олдини олиш учун истеъмол қилишади. Бундан ташқари, мазкур навда оддий шолига нисбатан икки баробар кўп оқсил ва клетчатка бўлиб, иммунитетни кўтариш хусусиятига эга. Олиб борилган тадқиқотлар натижасига кўра, қора гуруч парҳезли маҳсулотлар сирасига кириб, у астмани келтириб чиқарувчи бактерияларни нобуд қилади, турли хил тери касалликлари, шишлар, аллергиянинг олдини олади, ичакларни тозалайди.
Хабарда қайд этилишича, тибет қора гуручи маҳаллий оқ гуруч билан чангланиши натижасида янги гуруч тури пайдо бўлган.
«Унинг 317 донаси 6 грамм бўлиб, ҳовлида экиб кўпайтиришда давом этаяпмиз. Агар бу авлод ҳам қора рангини сақлаб қолса, патентга топширмоқчимиз. Номини ҳам ўйлаб қўйдим, ‘Қора шаҳзода’ – ‘Черний принц’, — дейди тадбиркор Равшан Асомитдинов.
Изоҳ (0)