Ўзбекистон тижорат банклари сентябрь-январь ойларида аҳолидан 854 млн доллар сотиб олди

2017 йилнинг сентябрь ойидан 2018 йилнинг январь ойига қадар Ўзбекистондаги тижорат банклари жисмоний шахслардан 854 миллион доллар миқдоридаги нақд хорижий валютани харид қилди. Бу ҳақда UzDaily хабар бермоқда.

Тижорат банкларининг хорижий валютани харид қилиш бўйича операциялар ҳажми энг кўп Тошкент шаҳрида (32 фоиз) кузатилди. Бундай турдаги операцияларнинг 10 фоизи Самарқанд, 8 фоизи Андижон, 9 фоизи Фарғона, 7 фоизи Наманган вилоятларида амалга оширилган.

Тижорат банкларининг жисмоний шахсларга хорижий валюта сотиш бўйича операциялари миқдори 56 миллион долларни ташкил этган.

Қайд этилишича, ўтган вақт мобайнида тижорат банклари томонидан жисмоний шахсларга валюта сотиш динамикаси ўсган. Сентябрда бу кўрсаткич 3,9 миллион, октябрда 11,9 миллион, ноябрда  17,8 миллион, декабрда 22,3 миллион долларни ташкил этган.

Жисмоний шахслар томонидан банкларга сотилаётган хорижий валюта миқдорининг ўсишига импорт билан шуғулланувчи хусусий тадбиркорларнинг бу операцияларни амалга ошириш учун «қора бозор»дан банк соҳасига ўтгани билан изоҳланади.