Жиззах вилояти ИИБ ЁХБ Зафаробод туманида ёнғинлар профилактикаси тадбирларини ўтказди, деб хабар беради вилоят ИИБ матбуот хизмати.
Тадбирда йўлларда ўрнатилган сунъий тўсиқларни олиб ташлаш, ёнғин ўчириш ерости сув олгичларининг доимо соз ҳолатда бўлишини таъминлашга эътибор қаратилиб, бу содир бўлган ёнғинларни қисқа муддатда талофатларсиз ўчириб олишда муҳим аҳамият касб этиши айтиб ўтилди. Тадбир давомида корхона, муассаса ва ташкилотларда, шунингдек, яҳоли яшаш хонадонларида ёнғин хавфсизлигини таъминлаш борасида тушунтириш ишлари олиб борилиб, йўриқнома ва эслатмалар тарқатилди.
Зафаробод шаҳарчаси «Олмазор» маҳалласида ўтказилган учрашувда мазкур маҳалланинг «Гулчилар» кўчасидаги уйда содир бўлган ёнғин фуқаролар иштирокида муҳокама этилди. Ёнғин натижасида оғилхонанинг 30 метр квадрат том қисмига зарар етган. Йиғилишда ёш болаларнинг қаровсиз қолдирилиши, уларнинг олов билан ўйнаши, хонадон эгасининг лоқайдлиги оқибатида ёнғин рўй берганлиги айтилди.
Тадбирда фуқаролар томонидан билдирилган таклиф-мулоҳазалар атрофлича ўрганилиб, уларни қизиқтирган саволларга жавоб берилди.
Изоҳ (0)