Фарғона водийси вилоятлардаги газ қуйиш шохобчалари 18 январь, пайшанба куни асосан 17:00 дан сўнг ҳайдовчиларга хизмат кўрсатишни бошлаган. Бу ҳақда «Дарё» мобил мухбирлари хабар берди, шунингдек, Telegram’даги Фарғона водийсига алоқадор йирик каналларда матнли ва овозли хабарлар қолдирилган.
Хабар беришларича, баъзи жойларда 14:00 дан бошлаб, аксарият ҳудудларда 17:00 дан сўнг газ қуйиш шохобчалари автомобилларга ёнилғи тарқатишни бошлаган. «Ҳамма заправкалар ишлаяпти, лекин навбат жуда катта», — деб ёзади «Водители Намангана» гуруҳи аъзоларидан бири.
«Айни вақтда деярли барча газ қуйиш шохобчалари ишламоқда. Шукр, муаммолар тезда ҳал қилинибди», — деб хабар қолдирилган «Водий Бозор» каналида.
Аввалроқ, 17 январда куннинг иккинчи ярмидан бошлаб водийдаги газ қуйиш шохобчаларида катта навбатлар юзага келишни бошлагани, ҳайдовчилар орасида «икки кунгача газ бўлмасмиш» деган миш-мишлар тарқалгани ҳақида хабарлар берилган эди.
Мавзуга доир: Водийда «газ инқирози». Газ шохобчаларида автонавбатлар юзага келган, одамлар манзилига қандай етиб олишни билмаяпти
Хусусан, «Дарё»нинг Фарғонадаги мобил мухбири «ёнилғи шохобчаларида газ йўқлиги сабаб шаҳарда йўл ҳақи 3—4 баробарга ошиб кетгани»ни билдирди. Андижон вилоятидаги мобил мухбири эса «вилоят маъмурий марказида йўл ҳақини бир маромда ушлаб туриш учун ўнлаб қўшимча автобуслар қатновга чиқарилгани» ҳақида маълум қилди.
Изоҳ (0)