Ақтўбе вилоятида рўй берган ва 52 кишининг ўлимига сабаб бўлган мудҳиш йўл-транспорт ҳодисаси муносабати билан Қозоғистонда махсус ҳукумат комиссияси тузилди. Бу ҳақда «Inform.kz» хабар бермоқда.
«Ақтўбе вилоятида рўй берган мудҳиш йўл-транспорт ҳодисаси сабабларини ўрганиш, шунингдек жабрланувчиларга ҳамда ҳалок бўлганларнинг оила аъзоларига ҳар томонлама ёрдам кўрсатиш учун муассасалараро махсус ҳукумат комиссияси тузилди», — дейилади хабарда.
Комиссия таркибига Қозоғистон ички ишлар вазири ўринбосари Ерлан Тургумбаев, соғлиқни сақлаш вазири ўринбосари Алексей Цой, ривожланиш ва инвестициялар бўйича вазир ўринбосари Роман Скляр, ташқи ишлар вазирлиги департаменти директори Ардак Мадиев, вилоят ички ишлар ва бошқа тизимларнинг вакиллари киритилган.
Қозоғистоннинг Ақтўбе вилояти Иргиз туманида салонидаги 52 йўловчиси билан автобус ёниб кетди. Ҳодиса 18 январь куни маҳаллий вақт билан 10:30 атрофида, «Самара—Чимкент» йўлининг 1068-километрида юз берган. Ҳаракат давомида Ikarus автобусида ёнғин чиққан, бу вақтда автобус салонида 55 йўловчи ва икки ҳайдовчи бўлган.
Ёнғин оқибатида 52 киши ҳодиса жойининг ўзида ҳалок бўлган. Уларнинг барчаси Ўзбекистон фуқаролари эди.
Изоҳ (0)