Қиш қишлигини қилиб қор ҳам ёғди. Қорни интиқ кутибмизу ҳаво ҳарорати пасайгач, коммунал хизмат кўрсатишда муаммолар юзага келишини ўйламаган эканмиз. Ҳатто соҳа масъуллари ҳам бу ҳақда бош қотирмаган кўринади, дея хабар беради ЎзА.
Бугун эрталаб соат 8:00 гача Самарқанд шаҳридаги Мирзо Улуғбек, Беруний ва Бўстонсарой кўчаларини ҳисобга олмаганда, бошқа йўлларга туз ва қум сепилмагани, йўллар қордан тозаланмагани шундай хулоса қилишга сабаб бўлди.
Кейинчалик музлаган йўлларга туз, қум сепилди. Лекин ишчилар, талаба ва ўқувчиларнинг асосий қисми соат 8:00 гача йўлга чиқиб, ўқиш, иш жойига етиб олиши зарур-ку?!
Яна бир ҳолат. Самарқанд шаҳрининг Абдураҳмон Жомий кўчасида жойлашган 1-Давлат нотариал идораси яқинида ичимлик суви қувури ёрилиб, кўчанинг ҳаракат қисмидан «булоқ» бўлиб оқиб ётибди. Аммо мутасаддилар ҳали-бери қувурни таъмирлашни хаёлларига келтирмайдиган кўринади. Беҳуда оқаётган сув кимнинг ҳисобига ёзиларкан?
Изоҳ (0)