Ўзбекистон Давлат статистика қўмитаси ахборотига кўра, 2017 йилда ФҲДЁ органларида 306 мингта никоҳ қайд қилинди.
Сурхондарё вилоятида 2016 йилга нисбатан 26,6 фоиз кўп никоҳ рўйхатдан ўтказилди. Ўсиш суръатлари бўйича кейинги ўринлар Жиззах ва Наманган (15,9%), Самарқанд (12,3%) ҳамда Қашқадарё (11,2%) вилоятларига тўғри келди.
2017 йилда 31,9 мингта никоҳдан ажралиш ҳолатлари қайд қилинди. Бир йил аввалги кўрсаткичлар билан таққослаганда энг юқори ўсиш Сурхондарёда қайд этилди — 28,6 фоиз. Шунингдек, Жиззах ва Сирдарё (22,2%) Самарқанд (21,2%), Наманган (19% ) вилоятлари ва Қорақалпоғистонда (18,2%) ҳам ажримлар сони ошган.
2017 йилда 715,5 минг бола туғилган бўлиб, мос равишда 1000 аҳолига нисбатан туғилиш коэффициенти 22,1 промиллени ташкил қилиб, 2016 йилга нисбатан 0,7 промиллега камайди. Туғилиш коэффициенти Сурхондарёда 2016 йилга нисбатан 25,7 промилледан 25,9 промиллега ўсди. Қолган ҳудудларда эса туғилиш сезиларли равишда камайгани қайд қилинган — Қорақалпоғистон Республикасида 21,9 промилледан 20,7 промиллега, Фарғонада 22,2 промилледан 21,0 промиллега, Тошкентда 20,3 промилледан 19,2 промиллега, Хоразмда 22,2 промилледан 21,0 промиллега, Бухорода 20,9 промилледан 20,0 промиллега ва Жиззахда 24,5 промилледан 23,6 промиллега.
Изоҳ (0)