16 январь куни Олий Мажлис Қонунчилик палатасида Ўзбекистон Президенти Шавкат Мирзиёевнинг Олий Мажлисга мурожаатномасига бағишланган брифинг бўлиб ўтди.
Тадбир мурожаатноманинг, шунингдек, «Фаол тадбиркорлик, инновацион ғоялар ва технологияларни қўллаб-қувватлаш йили» Давлат дастури лойиҳаси мазмун-моҳиятини кенг жамоатчиликка етказиш мақсадида ташкил этилди. Айнан шу мақсадда тадбирга Ўзбекистонда аккредациядан ўтган хорижий ОАВ вакиллари, шунингдек миллий оммавий ахборот воситалари ходимлари таклиф этилди.
Брифингда Олий Мажлис Сенати раиси ўринбосари Содиқ Сафоев, Олий Мажлис Қонунчилик палатаси спикери ўринбосари Сарвар Отамуротов, ташқи ишлар вазири ўринбосари Саидикром Ниёзхўжаев ва «Тараққиёт стратегияси» маркази ижрочи директори, Олий Мажлис Қонунчилик палатаси депутати Акмал Бурхонов нутқ сўзлади.
Тадбир давомида Президент Шавкат Мирзиёев мурожаатномасининг асосий мазмуни ва моҳияти муҳокама қилинди. Тадбир иштирокчилари мурожаатнома ва 2017—2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясидан келиб чиқадиган Ўзбекистонни 2018 йилда ривожлантириш бўйича долзарб мақсад ва вазифалар, шунингдек ушбу ташаббусларни амалга ошириш механизмлари билан таништирилди.
«Тараққиёт стратегияси» маркази ижрочи директори Акмал Бурхоновнинг сўзларига кўра, 2018 йилги Давлат дастури лойиҳаси муҳокамасига қисқа муддат ичида 4000 мингдан зиёд фикр-мулоҳаза ва таклифлар келиб тушди. Бу 2017 йилги Давлат дастури муҳокамаси пайтидагига нисбатан уч баробар кўп ҳисобланади. 20 январгача жамоатчилик муҳокамаси натижалари ва келиб тушган таклифлар таҳлили асосида Давлат дастурининг такомилига етказилган лойиҳаси тасдиқлаш учун киритилади.
Изоҳ (0)