Англиялик 14 ёшли мактаб ўқувчиси Ниам Болдуин «нобоп ташқи кўриниши» сабабли вақтинча дарслардан четлатилди. Қиз январь ойининг бошида сочини калга олдирган ва уни касал болаларга ёрдам бериш мақсадида хайрия учун бериб юборган. Бу ҳақда TJournal хабар берди.
Болдуиннинг онаси айтишича, ўқувчининг ўзи Янги йилдан кейин сочини олдиришни таклиф қилган. Улар биргаликда сочларни болалар ясама сочларини тайёрловчи Little Princess Trust ташкилотига юборган.
Эртаси куни Бодуин дарсларга қўйилмаган. Муассаса раҳбарияти буни қизнинг «нобоп кўриниши» билан изоҳлаган. Қизнинг онаси бу қарорни «таҳқирлаш« деб атаган. Болдуин сочлари бироз ўсгач, тўрт кундан кейин машғулотларга қўшилган, унгача эса уйида шуғулланган.
Ўқув муассасаси қизнинг кўриниши «нобоп ва эътиборни тортувчи» бўлганини ва унинг хайрия акциясидаги иштирокидан бехабар эканлигини маълум қилган.
Изоҳ (0)