Тошкентнинг «Бунёдкор» клуби бош мураббийи Миржалол Қосимов «Championat.asia» нашрига интервью бериб, жамоани тарк этган ва этиши мумкин бўлган футболчилар борасида фикр билдирди.
Қосимовнинг айтишича, Ўзбекистон миллий терма жамоаси ЖЧ—2018 чиптасини қўлга кирита олмагани Отабек Шукуровга жиддий таъсир қилган. Мураббий фикрига кўра, агар мундиал йўлланмаси қўлга киритилганида, Шукуров «Бунёдкор»ни тарк этмаган бўларди.
Шукуровнинг биз билан шартномаси тугаганди. Шунинг учун ҳам Амирликларга кетди.Бунга қадар Шукуровни «Пахтакор» ҳам ўз сафига қўшиб олишни истаганди. Бироқ у хориж вариантини маъқулроқ кўрди. Унинг қарорини тўғри тушуниш мумкин. Футболчининг футболдаги умри қисқа бўлади, шу сабаб ҳам шароитлари яхшироқ клубда ўйнашни истайди. Биз футболчиларга айни пайтда улар истаган шароитни таклиф қилолмаймиз.
Миржалол Қосимов, «Бунёдкор» бош мураббийи
«Бунёдкор» етакчиларидан бири Отабек Шукуров эркин агент мақомида «Шаржа» билан шартнома имзолади
Мутахассиснинг қайд этишича, «Пахтакор»даги шароит «Бунёдкор»дагидан яхшироқ. Шунинг учун ҳам «шерлар» эркин агентга айланган сара футболчиларни бемалол ўз сафига қўшиб олмоқда. Қосимов, шунингдек, «Пахтакор» Достон Ҳамдамовга қизиқиб қолганини ҳам инкор қилмаган.«Пахтакор» тарафдан Достонга қизиқиш бор. Футболчининг эса «Бунёдкор» билан яна 1 йиллик шартномаси мавжуд. Агар икки томон раҳбарияти ўзаро келиша олса, Ҳамдамов бу мавсумни янги клубда ўтказиши ҳам мумкин.Спортда паст-у баландликлар учраб туришини ва ҳаммаси ҳар доим ҳам бир текис кечмаслигини айтиб ўтган Қосимов, айни пайтда бор эътиборини академиядан етишиб чиқаётган футболчиларга қаратишга мажбурлигини қўшимча қилган.Қолаверса, масалада Достоннинг ҳам роли бўлади. Агар у «Пахтакор»га кетишни истаса, биз футболчини мажбурлаб олиб қололмаймиз.
Миржалол Қосимов, «Бунёдкор» бош мураббийи
Ҳамма чўнтагига қараб иш қилади. Унда 10 сўм пул бўлса, бозордан 20 сўмлик маҳсулот сотиб ололмайсиз-ку. Жамоани ҳозир етакчи футболчилар тарк этмоқда. Ваҳоланки, ҳаммасининг ўз ўрни бор.Менга қолса Достон Ҳамдамовни олиб қолган бўлардим. Агар у сотиладиган бўлса ҳам, янги футболчи ҳақида ўйлашдан олдин, мавжуд футболчилар олдидаги қарздорлик ёпилади. Жамоадан ким кетса ҳам, ким келса ҳам — «Бунёдкор»нинг мақсади ўзгармайди. Биз ҳар қандай футболчи билан бўлса-да, доимо курашишга тайёр бўламиз.
Миржалол Қосимов, «Бунёдкор» бош мураббийи
Изоҳ (0)