Тошкент шаҳрида йил давомида коррупция билан боғлиқ салкам 500 ҳолат аниқланди

Тошкент шаҳрида йил бошидан буён пора олиш ёки порахўрликда воситачилик қилиш билан боғлиқ 493 ҳолат рўйхатга олинди. Бу ҳақда ИИББ бошлиғи ўринбосари Дониёр Тошхўжаев маълум қилди, дея хабар беради «Газета.uz».

Сохта пул тайёрлаш ва муомалага чиқариш бўйича 33 та, валютани ноқонуний сотиб олиш ёки муомалага чиқариш бўйича 92 ҳолат аниқланди.

Шаҳар прокуратураси бўлим бошлиғи Бобир Деҳқонов 29 нафар мансабдор шахс коррупцион жиноятларга қўл урганини маълум қилди. Улар Ўзбекистон Жиноят кодексининг 210-(пора олиш), 211-(пора бериш) ва 212-(порахўрликда воситачилик қилиш) моддалари бўйича жавобгарликка тортилди.

«Мансабдор шахслар қаторида ички ишлар органлари, суд қарорларини ижро этиш департаменти, нотариал идоралар, ўрта махсус касб-ҳунар таълими муассасалари, коммунал хизматлар ходимлари мавжуд», — дея аниқлик киритди прокуратура вакили.