«Ижтимоий фикр» маркази томонидан мамлакат аҳолиси ўртасида «Давлат ҳокимияти ва хўжалик бошқаруви органларининг фуқаролар мурожаатлари билан ишлаши жамоатчилик фикри кўзгусида» мавзусида сўровнома ўтказилди. Бу ҳақда марказ матбуот хизмати хабар бермоқда.
Жамоатчилик фикри сўровлари мониторингида 2017—2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясини «Халқ билан мулоқот ва инсон манфаатлари йили»да амалга оширишга оид давлат дастури доирасида амалга оширилаётган чора-тадбирларнинг мамлакат фуқаролари томонидан ҳар томонлама қўллаб-қувватланаётганлиги аниқланди.
Ўзбекистонликларнинг 80 фоиздан ортиғи давлат ҳокимияти ва хўжалик бошқаруви органларининг фуқаролар мурожаатлари билан ишлаш бўйича фаолиятини ижобий баҳолади ва барча даражадаги ҳокимият органларида келган шикоят ва аризаларга тезкорлик билан муносабатда бўлиниши, аҳолининг пайдо бўлаётган муаммолари ўта қисқа муддатларда ҳал қилинишига эътибор қаратди.
Сўров жараёнида аниқланишича, ҳар тўртинчи респондент ўз муаммоларини ҳал қилиш учун давлат ҳокимияти ёки хўжалик бошқаруви органларига мурожаат қилган. Давлат ҳокимияти ёки хўжалик бошқаруви органларига мурожаат қилган фуқароларнинг фаоллиги давлат ва жамият ҳаётининг аҳоли манфаатларига кескин дахлдор у ёки бу соҳаларига тузатиш киритишга, фуқароларни ташвишлантираётган, кескин муаммоларни аниқлашга ва уларни бартараф қилиш бўйича ўз вақтида чора-тадбирлар кўришга имкон беради.
Олинган сўров натижаларига мувофиқ, фуқароларнинг 32,9 фоизи ўз ҳуқуқ ва манфаатларини ҳимоя қилиш ёки қайта тиклаш ҳақида илтимос билан турли даражадаги ҳокимликларга, ҳар тўртинчи респондент маҳалла қўмитасига ёки «Халқ қабулхоналари»нинг туман бўлимига мурожаат қилган.
Сўровнинг кўрсатишича, 93,6 фоиз ҳолатларда фуқаролар ўз ҳуқуқ ва манфаатларини ҳимоя қилиш, қайта тиклаш ёки таъминлашни сўраб давлат ҳокимияти ёки хўжалик бошқаруви органларига шахсан ва ўз ташаббуси билан мурожаат қилган, сўралганларнинг қолган қисми бошқа кишининг маслаҳати ва тавсияси билан давлат идораларидан ёрдам сўраган.
Изоҳ (0)